Uparuaasoqareersoq: Borgmesterip suliaq Nakkutilliisoqarfimmut nalilertinniarpaa
Nakkutilliisoqarfiup kommunalbestyrelsip qaqugukkut oqaluuserisassamik itigartitsissuteqarsinnaanera isummerfigissavaa, borgmesteri oqarpoq.
Namminersorlutik Oqartusat Nakkutilliisuisa Kommuneqarfik Sermersuumut kaammattuutigisimavaat, kommunip ineqarneq pillugu suliaanut politikkikkut akisussaaffimmik inissiisoqarnissaa pillugu oqaluuserisassaq qaqeqqinneqassasoq.
Nakkutilliisut isumaqarput, kommunalbestyrelsip februaarip 18-ani ataatsimiinnermi oqaluuserisassanngortinneqarsimasumik itigartitsissuteqarsimanera inatsisinik unioqqutitsinerusoq.
Borgmesterip Charlotte Ludvigsenip (IA) Sermitsiaq.AG-mut oqaatigaa, Nakkutilliisut suliamik naliliisimanerat isumaqatiginnginnamiuk, Nakkutilliisoqarfiup naliliinissaa piumasarisimallugu:
- Nakkutilliisunut isumaqataanngilagut, naliliisimanermullu eqqartuussissuserisup allakkiaa tapersiisoq pigaarput. Taamaammat Nakkutilliisoqarfiup naliliinissaa piumasaraarput, borgmesteri oqarpoq.
- Suliaq qaqeqqinneqassasoq
Borgmesgterip tamatumunnga peqatigitillugu neriorsuutigaa, Siumumi politikkerip Inga Dora G. Markussenip oqaluuserisassanngortissimasaa qaqeqqinneqassasoq Nakkutilliisoqarfimmit aalajangiunneqarpat, oqaluuserisassanngortinneqarsimasoq qaqeqqinneqassasoq:
- Nakkutilliisoqarfimmit Nakkutilliisut isumaqatigineqarpata, oqaluuserisassanngortinneqarsimasoq suliassanngorteqqinneqassaaq, borgmesteri oqarpoq.
Apeqqut: Kommuni inatsit malillugu suliaqarsimanngitsoq Nakkutilliisut kommunimut nalunaarutigeqqissappassuk, borgmesteri tamatumunnga qanoq isumaqarpa?
- Kukkusumik iliuuseqarsimanerarnerput nuanninngilaq. Taamaammat Nakkutilliisoqarfimmut apeqqutigerusuppara, oqaluuserisassamik qaqugukkut itigartitsisissuteqarsinnaanersugut. Kommunalbestyrelsimi politikkikkut amerlanerussuteqartut oqaluuserisassanngortitamik itigartitsissuteqarsimapput, Charlotte Ludvigsen oqarpoq, nangillunilu:
- Akisussaaffimmik tigusillunga tunuaqquneqarnerma saniatigut siunnersuuteqarnermi suna anguniagaanersoq takujuminaatsippara. Kommunalbestyrelsilli tamanna aalajangersinnaanngilaa. Uanga kisima tamanna aalajangersinnaavara.
Nakkutilliisut: Politikkikkut akisussaaffiliisoqarnissaa aalajangiunneqarsinnaavoq
Borgmesterip Inga Dora G. Markussenip siunnersuutaa, borgmesteritut tunuartinneqarsinnaanera pillugu taasisoqassasoq paasisisimavaa.
Siunnersuummili politikkikkut akisussaaffiliisoqarnissaa pineqarpoq, Nakkutilliisullu isumaat malillugu kommunalbestyrelsi tamatumunnga isummersinnaavoq.
Nakkutilliisut naliliisimanerat eqqartuussissuserisoqarfimmut Poul Schmidtimut nalilertinneqarsimavoq, eqqartussissuserisullu nalunaarutigisimavaat, siunnersuut itigartitsissutigineqassappat kommunalbestyrelsip suliassaasa avataaniissasoq. Siumumilu politikkerip siunnersuutigisimasaa kommunalbestyrelsip suliassarinngikkaa eqqartuussissuserisoqarfimmit inerniliunneqarsimavoq.
Kommunip eqqartuussissuserisua allatut inerniliisoq
Omvendt har Kommuneqarfik Sermersuup aamma Advokatfirmaet Malling & Hansen Damm naliliitissimavaa. Eqqartuussissuserisoqarfik tassani akerliusumik isummersimavoq:
- Siunnersuummi oqaasertaliunneqarsimasut malillugit takuneqarsinnaavoq, akisussaaffimmik inissiisoqarnissaa kissaatigineqartoq. Qulequtsiussami politikkikkut akisussaaffimmik inissiisoqarnissaa allassimavoq, siunnersuutilli nassuiaatitaaani inatsisitigut akisussaaffiliisoqarnissaa pineqarnerulluni. Tassungalu atatillugu politikkikkut akisussaaffiliiniarnermi sunarpiaq pineqarnersoq erseqqissumik allassimasoqarani.
- Tamanna tunngavigalugu isumaqarpunga, oqaluuserisassanngortinneqarsimasoq taamatut isikkoqartillugu suliarineqartariaqanngitsoq, allagaatini Sermitsiaq.AG-mit takuneqarsimasumi allassimavoq.