nuna ikuallattoq
Upalungaarsimasuutitat nunami ikuallattoq ulloq unnuarlu qamisarpaat
Tallimanngornermat aallartittumik Nassuttuumi ikuallattup siammartinnginnissaa pinaveersaartinniarlugu ulloq unnuarlu atorneqarput. Sumiffimmilu siallissamaarluni
Qaasuitsup Kommuniata annaassiniartartutut upalungarsimasuutitai ulloq unnuarlu atorlugu Nassuttuumi ikuallanneq siammartinnaveersaarlugu ulappupput.
- Ilulissani qatsisartut immikkoortulersukkani ikuallanneq siammartinnaveersaarlugu tallimanngormalli sulipput. Aamma Qasigiannguani qatserisartut immikkoortulersukkat eqqaanni suliaqarput, Qaasuitsup Kommuniani Annaassiniartartutut Upalungaarsimasuutitat aamma Qaasuitsup Kommuniani tusagassiuutinut nalunaarummi allapput.
Atuaruk: Qamisaaniarneq arriippallaaqaaq
Siallissamaartoq
Qeqertarsuup Tunuata annersaanut, Kangerlussuaq ilanngullugu, nalaani silap qanoq innissaanik eqqoriaanerminni sisamanngornerup missaanniit sapaat/ataasinngorneq ilanngullugu sialoqarnissaanik ilimasaarisoqartoq, ilanngullugu paasissutissiarineqarpoq.
- Silaluk ataavartumik kuuttoq kuussagaluarpat ikuallanneq unikaallatsinneqassaaq pitsaanerpaamillu ikuallannerup siarunaakkunnaarneranik kinguneqarsinnaavoq; ingammik tatsit parnguttut kuuffigineqarlutik tasinngoqqissappata, Qaasuitsup Kommuniani Annaassiniartartutut Upalungaarsimasuutitat aamma Qaasuitsup Kommuniani tusagassiuutinut nalunaarummi allapput.
Assit takukkit: Piniartarfimmi nuna ikuallattoq
Navianarsiortoqanngitsoq
Upalungaarsimasuutitat alapernaallutik ikullattumik qulaavaanerminni umimmannik, tuttunik inunnillu takusaqanngillat. Taamaattumik uumasut, inuit illullu navianartorsiortinneqarsimassanngitsut upalungaarsimasuutitanit eqqoriarneqarpoq.
- Pinngortitaq panertupilussuuvoq, taamaattumik uumasut nunaminertanut isugutannerusunut naasoqarnerusunullu nerisassanik malillugit qangali illuareersimagatinneqarput. Ikuallanneq una qamisassallugu unammillernartorujussuussasoq paasereerparput. Kalaallit Nunaanni Namminersorlutik Oqartussat qamisaanermut atortunik ikiorsiisinnaanerannik noqqaavigereerpavut – noqqaasuterpulli itigartitsissutigineqarpoq, tusagassiuutinut nalunaarummi nalunaarutigineqarpoq.
Atuaruk: Pujortarnerit innermillu atuinerit inerteqqutigineqarput
Ikuallannerup siammartinnginnissaanut pilersaarut
Ikuallanneq qatsissumi aallartippoq, tamaanilu imeqannginnera peqqutaalluni qamisaruminaalluni. Qatserinermut imermik milluaassutinik taama qutitsigisumi atorneqarsinnaasunik annaassiniarnermut upalungaarsimasuutitat milluaassuteqanngillat. Taassuma saniatigut qulimiguullit pujorpallaarneranik peqquteqartumik nunamut missinnaasimanngillat.
- Annaassiniarnermik upalungaarsimasuutitat ikuallattumik uannga qamisaanissaminnut ”inorsarput”, ikuallattup qatsisartutta atortuttalu inunngisaannut qallinissaa utaqqisariaqarsimavarput – ingammik qatserinermut imermik milluaatit angallattakkat – uagut atortakkavut – tatsinut mangussinnaasagut kisiisa atortorigatsigik, Qaasuitsup Kommuniani Annaassiniartartutut Upalungaarsimasuutitat aamma Qaasuitsup Kommuniani tusagassiuutinut nalunaarummi allapput.
Annaassiniarnermik upalungaarsimasuutit taamaattumik ikuallattoq siaruartinnaveersaarniarlugu suliusissiorput ima: imermik milluaaffiusinnaasut, soorlu tatsinik imarmillu, atortunik milluaatitsilluni serparsaasarnissat annaassiniarnermillu upalungaarsimasuutitat atortui atorlugit qamisaalluni serpasaasoqartassalluni.