Januaarip qiteqqunnerani Nalunaarasuartaateqarnermut Aqutsisoqarfik Narsamut misissuiartorpoq.

Nalunaarasuartaateqarnermut Aqutsisoqarfik Kommune Kujallermi upalungaarsimasunit saaffigineqarnerata kingorna tamanna pivoq, radiukkut attaveqaatit upalungaarsimasut atortagaasa akornusersorneqarnerannut tamanna tunngavoq.

Illoqarfiup taxai pingasut akornusersuinermut pissutaasut paasineqarpoq. Nalunaaruteqartarnermut atortut pinartoqartinnagu aallartittarnerannik tamanna kinguneqarpoq, upalungaarsimasullu pisariaqanngitsumik qatserisartoqarfiliartarsimapput, Nalunaarasuartaateqarnermut Aqutsisoqarfik Sermitsiaq.AG-mut ilisimatitsivoq.

Taxat radiuisa attaveqaataat upalungaarsimanermut attaveqaatinut atorneqartunut qanippallaartumik inissinneqarsimanerannik tamanna pissuteqarpoq, Nalunaarasuartaateqarnermut Aqutsisoqarfik tusagassiuutinut nalunaarummi taama oqaaseqarpoq.

Akuersissutit arlallit amigaatigineqartut

Nalunaarasuartaateqarnermut Aqutsisoqarfik taxanik, upalungaarsimasunik, Kommune Kujallermik aamma Narsami politiinik suleqateqarluarsimasoq, tamannalu Nalunaarasuartaateqarnermut Aqutsisoqarfiup nuannaarutigigaa, tassani atuarneqarsinnaavoq.

Misissuinermut atatillugu taxat arlallit radiukkut attaveqarnermut atortut akuersissuteqarnatik atorsimagaat, Nalunaarasuartaateqarnermut Aqutsisoqarfiup paasivaa. Nalunaarasuartaateqarnermut Aqutsisoqarfiup tamanna maluginiaqquaa – Narsamilu taxartitsisut tamarmik radiumut attaveqaatinik atuinissamut akuersissutit pisariaqartinneqartut pissarsiarisimalerpaat.

Kikkut tamarmik biiliminni radiukkut attaveqaatinik atuisut akuersissummik peqanngitsut qinnuteqaqqullugit, Nalunaarasuartaateqarnermut Aqutsisoqarfiup eqqaasitsissutigaa.

Qinnuteqarnermut immersugassat Nalunaarasuartaateqarnermut Aqutsisoqarfiup nittartagaani nassaarineqarsinnaapput.