Upalungaarsimasut pisortartaamik nutaamik akuersisut
Komuni Kujallermi upalungaarsimasut pisortartaavat qatserisartut arlallit atortinitsitsinermut akerliummata tunuarnikuuvoq. Maannalu upalungaarsimasut pisortassaat nutaaq atorfinitsinneqarsimavoq.
Asmus Hansen Kommune Kujallermi upalungaarsimanermut pisortatut ulloq 1. september 2020 aallarnerfigalugu atorfinippoq, kommuni nittartakkamgiut oqaluttuarpoq.
- Asmus Hansen ukiuni 30-ni qatserisartutut annaasiniartartutut sulinikuuvoq, taamaammat upalungaarsimanermut annaassiniaanermullu annertuumik misilittagaqarpoq, kommuni atorfinitsitsineq pillugu allappoq.
Pisortaq nutaaq atorfinitsinneqarpoq, juunip qaammataani upalungaarsimanermut pisortatut atorfinitsinneqartoq pillugu aalassassimaartoqareersoq. Taamanikkut qaterisartut qulit atorfinitsitsinermut akerliullutik atorfimminnit tunuarput.
Qatersisartut isumaqaramik kommuni kukkusumik atorfinitsitsisimasoq aamma pisortartaaq sivikitsuinnarmik suliffeqartartoq.
Tigulluarneqarnerusoq
Akerliusoqarnerata malitsigisaanik, pisortatut atorfinillaaq atorfittaamini suli aallartinnani tunuarniarluni aalajangersimavoq.
Kommuni maanna upalungaarsimanermut pisortassamik nutaamik atorfinitsitsilluni misileeqqippoq.
Atorfinitsitsinerlu tamatumuuna malunnaatilimmik tigulluarneqarneruvoq. Qaqortumi qatserisartut sinniisorigallagaaq Ib Skærlund taamatut oqaluttuarpoq:
- Atorfinitsitsineq tigulluarneqarpoq. Kujataanimi najugaqarpoq Narsameersuullunilu. Maanna pisortartaaq ilisarisimalerniarlugu iliuuseqarpugut, Ib Skærlund Sermitsiaq.AG-mut oqarpoq.
Sinniisoq naapertorlugu. qatserisartut juunip qaammataani akerliullutik suliffimminnit soraartut amerlanersaat upalungaarsimasutut suleqqilersimapput. Tamanna pisimavoq, kommuni qatserisartullu aaqqiissuteqarniarlutik ataatsimeeqatigeereersut.