Unnuk ullorialik
Nunatsinni ulloriarsiuut siullersaat, Ivalu Barlach Christensen, Nunatta Atuagaateqarfiani qilak ullorialik aamma unikkaartuanik saqqummiussisoq, sapaatip akunnerani kingullermi tusarnaarneqarsinnaavoq.
- Ungasissusilersuut lysår sunaava?
- Filmi ”Interstellar” qanittukkut takuara. Avataarsuani sullorsuarnik (ormehuller) nassaassaqarpa?
- Ulloriarsiuumut ulloq suliffik qanoq ittarpa?
Ivalu Barlach Christensen kalaallit unikkaartuaataasa qilammut ullorialimmut atanerat pillugu minutsini 45-ni saqqummeereersorlu apeqqutit ilaat taama nipeqarput.
Aviisi AG taama allappoq.
Nunatsinni ulloriarsiuut siullersaat tusarnaarniarlugu inuit 30-t missaaniittut Nunatta Atuagaateqarfianut takkupput. Alborg Universitetimit fysikimi bacheloriuvoq, Lund Universitetimi ulloriarsiuutut (astronomi) astrofysikeritullu kandidatiulluni. Max-Planck-Institutimi Radioastronomimi ph.d.-nngorniumminik suliaqarpoq.
Ivalu Barlach Christensen Nuup qeqqani atuakkanik atorniartarfimmi ullualunnguit ingerlaneranni meeqqanut marloriarluni oqalugiarpoq sammisaqartitsillunilu.
Atuartunit ilinniartunillu akulikitsunik attavigineqartarpoq, oqaloqatiginissaannullu piffissaqarniartarluni neriulluni ullut ilaanni taakkua ilai suleqatigilerumaarlugit.
Ulloriarsiuutut kandidatimut ilinniarluni aallartikkami qilak ullorialik qanoq immikkuullaritsigisoq malugilerpaa. Nunatsinni qilammi ullorissat imaannaanngitsut assiliorniarsaralugit misilinnissaa pingaaruteqartippaa. Assersuutigalugit Kinamiut Grækerillu qilammi assiliaataannut nallersuussinnaapput.
- Ullorissat pillugit oqaluttuaativut amerlanerit siulittuutit pillugit oqaluttuaapput, aamma uagut meeqqanut – kinguaariinnut tullernut – ullorissat atorlugit oqaluttuarisarparput qanga pisunit isigineqartut. Ullorissat isigiuaannarpaatsit, oqarpoq.
Aviisimi AG-mi atuarnerusinnaavutit. Aviisi uani pissarsiariuk:
