Unnuk kulturisiorfik: Erinarsorneq, nipilersorneq atisanillu takutitsineq
Københavnimi unnuk kulturisiorfik ingerlanneqarmat kalaallit kulturiannik nittarsaassisoqarpoq
Københavnimi Kalaallit Illuutaat tallimanngornermi unnukkut erinarsorpalaamik tusagassaqarfiuvoq kalaallillu atisaliaannik takutitsisoqarluni. Tamanna pivoq Københavnimi unnuk kulturisiorfimmut atatillugu, tamatumanilu tallimanngornermi ukiakkut atuanngiffeqalernissaq sioqqullugu Københavnimi najugallit ukiut 26-t ingerlaneranni pisarsimasutut unnukkut illoqarfimmi aaqqissuussinerpassuarnut takuniaanissamut aggersarneqarsimallutik.
Københavnimi Kalaallit Illuutaat erinarsornermik, kalaallit atisaliaannik takutitsinermik unnullu naggaserlugu Da Bartali Crewikkut nipilersornerannik unnuk kulturisiorfimmut tapersiissuteqarpoq.
- Unnuk ingerlalluarpoq. Inuit qiimalluarput, tamarmillu nuannaarlutik, Anita Høegh, umimmaat qiviuinik suliaqartarfimmit Qiviuneersoq atisanillu takutitsinermi aaqqissuusseqataasoq, oqarpoq.
- Qiviunit peqatigineqarput Isaksen Design, Inuit Quality, Great Greenland aamma G-land. Arctic 5 ataatsimut taaguusiullugu kalaallit atisaliaanni nutaanerpaanik saqqummiussivugut, taakkualu isiginnaarianit uummaarissunit ilassilluarneqarput.
- Nuannaarnermi akornutituaasoq tassaavoq sila. Siallingaatsiarpoq. Tamanna nuannerpallaanngilaq, atisanik takutitsisut ilaatigut kaajaluisami natersuaq aappaluttoq aamma pisuffigisussaammassuk, taamaattumik sialussiutit siaartartut nassaarineqarsimanerat nuannaarutigaarput. Tamannalu atisanik takutitsinermi immikkut aliikkutaasutut atuinnarsinnaavarput, Anita Høegh oqaluttuarpoq.