Unnerluutiginninneq: Kinguaassiutitigut kannguttaatsuliorsimasoq politiitut sulisuusoq

Arnat marluk siorna politeeq kinguaassiutitigut kannguttaatsuliorsimasutut unnerluutigaat. Arnat taakku meeraaneranni inuusuttuunerannilu kannguttaatsuliorneq pisimannguatsiarpoq. Kalaallit Nunaanni politiit unnerluussutit misissorsimavaat, unnerluussinianngillalli. Imminnut pisuuteqattaannerummat. Suliap aappaa maanna unnerluussisussaatitaasutut oqartussanut suliassanngorteqqinneqarpoq

Arnajaraq Joelsen aamma Pilutannguaq Petersen inuunerminni piffissani assigiinngitsuni angummit ataatsimit kinguaassiutitigut atornerlunneqarsimapput. Unnerluussut taamatut nipeqarpoq, naak Kalaallit Nunaanni Politiit Københavnillu Politiivi unnerluussutsit pillugit uppernarsaatissarsisimanngikkaluartut.

Aviisi AG taamatut allappoq.

Angut politiiuvoq sulilu politiitut sulilluni. Sunngiffimmini timersortartunut sungiusaasuuvoq. Ullumikkut 34-nik ukiulik Arnajaraq Joelsen naapertorlugu meeraaranguunerminiit inuusuttunngorluni allamut nuunnissami tungaanut kannguttaatsuliortumit sammineqartarsimavoq. Taamaakkaluartoq aatsaat ukiut sisamat matuma siorna angut unnerluutigaa.

Politiit oqaaseqaataat:

Chefpolitiinspektør Svend Foldagerip oqaatigaa, niviarsiaqqat marluk kannguttaatsuliorfigineqarsimanerannut tunngatillugu suliassat marluk Kalaallit Nunaanni Politiit tigusimagaat misissorlugillu. Kannguttaatsuliorfigitissimanerit aatsaat ukiorpassuit qaangiummata nalunaarutigineqarput. Pasisaasoq suliat pillugit killisiorneqarsimavoq. kingusinnerusukkut suliat inatsisilerituunit misissorneqarsimapput, sulialli ingerlateqqinneqarnissaannut tunngavissiisinnaasunik uppernarsaatinik nassartoqarsimanngilaq.

Oqaatigineqassaaq pisimasoq ukiorpassuit qaangiutereerneranni nalunaarutigineqaraangat erseqqissumik paasisaqarnissaq ajornartuaannartoq.

Allaaserineqartoq aviisimi AG-mi tamakkiisumik atuarneqarsinnaavoq. Aviisi uani pisiariuk:

Powered by Labrador CMS