Unnerluutigineqartut: Katersugaasivimmi aserorterisimaneq angummillu toqutsisimaneq
Angutit marluk Tasiilap katersugaasiviani aserortererujussuarsimasutut unnerluutigineqartut ataasinngorpat eqqartuussivilersuunneqassapput. Angutit pineqartut aappaa aamma angummik allamik persuttaasimasutut, kingusinnerusukkut toqussutigisimasaanik, unnerluutigineqarpoq.
Sermersuup Nuummi eqqartuussiviata Tasiilami pisimasup uissuumminartup suliarinissaanut ullut pingasut atorniarpai.
Anguit marluk eqqartuussaassapput, taakku marluullutik siorna septemberip 30-ata oktoberillu aallaqqaataata akornanni Tasiilap katersugaasiviani aserorterisimasutut unnerluutineqarput.
Sikaaviit igalaaminiusut, issiaviit, ilitsiviit (reolit), atortut elektroniskiusut eqqumiitsuliallu aserorterneqarsimapput, allagarlu unnerluussutaasoq naapetorlugu katersugaasivimmi aserorterisimaneq 736.647,86 koruuninik naleqarsimavoq.
Asrorterisimanermut atatillugu arnaq angullu alla aamma unnerluutigineqarput, taakkuli pillugit suliaq eqqartuussinermi allami suliarineqassaaq.
Unnerluussut: Angummik pisuinnaat aqqutaanni saassussisimasoq
Angutip appaa aserorterisimasutut unnerluunneqarnermi saniatigut, 42-nik ukiulimmik Odin Mikikimik toqutsisimasutut aamma unnerluutigineqarpoq, Odin Mikiki siorna Tasiilami oktoberip qulingani ilisimanngitsoq nillulerorlu siumorneqarsimavoq.
Odin Mikiki Islandimi napparsimmavimmut aallarunneqarsimasoq, oktoberillu aqqarnani toqukkut qimagussimalluni.
Allagaq unnerluussut naapertorlugu, Odin Mikiki illoqarfimmi inuinnaat aqqutaanni, oktoberip qulingiluaani unnukkut qulinut tanneq qulingiluat aamma oktoberip qulingani ullaakkut arfernup akornanni angummit unnerluutigineqartumit saassunneqarsimavoq.
Tassani niaqqumigut annersinneqarami uppissimavoq, allagarlu unnerluussut naapertorlugu uppimmat unnerluutigineqartup niaqutigut isimmittarlugulu tukkartorsimavaa. 42-nik ukiulik persuttarneqarami niaqqumigut ikilerneqarsimavoq, ilaatigut niaquata saarnga innarlerneqarsimalluni.
Inuup inuuneranik ilaginnaasimasutut unnerluutigineqartoq
Angut persuttarneqarsimasoq pisuinnaat aqqutaannut sila qerinnarsilersoq qimaannarneqarsimavoq, tamatumalu kinguneranik oktoberip aqqarnani toqukkut qimagussimalluni.
Angut aserortereqataasimasutut unnerluussaaqataasoq, toqutsisimanermut atatillugu aamma unnerluutigineqarpoq. Paragraffi inuup inuuneranik ilaginnaanermut tunngassuteqartoq malillugu angut unnerluutigineqarpoq, politiit misissuisimanerat naapertorlugu 42-nik ukiulik Odin Mikiki persuttagaasimanermi kinguneranik inuunerminik ulorianartorsioraluartoq ikiorsimanngimmagu.
Unnerluussisussaatitaasunit piumasarineqarsimavoq, toqutsisimasutut unnerluutigineqartoq ukiuni arfineq-marlunni pinerluuteqarsimasunut inissiisarfimmiittussanngorlugu pineqaatissinneqassasoq, unnerluutigineqartullu aappaa ukiumi ataatsimi qaammammilu ataatsimi pinerluuteqarsimasunut inissiisarfimmiittussanngorlugu pineqaatissinneqassasoq.
Eqqartuussissuserisoq Naja Joelsen toqutsisimasutut unnerluutigineqartumut illersuisuuvoq. Taassuma Sermitsiaq.AG-mut ilisimatitsissutigaa, unnerluutigineqartup unnerluussutinut qanoq isumaqarnera maannakkorpiaq oqaatigisinnaanagu.
Eqqartuussissuserisup Ulrik Blidorfip, suliami unnerluutigineqartup aappaanut illersuisuusup, unnerluutigineqartup unnerluussutinut qanoq isumaqarnera aamma oqaatigisinnaanninnerarpaa.