Unnerluutigineqartoq ulluni 28-ni tigummigallarneqarpoq – eqqartuussisuuneqarfimmut suliareqqitassanngortinneqartoq
Eqqartuussisoqarfik Sermersuup angut ulluni 28-ni tigummigallarneqassasoq sisamanngornermi aalajangerpaa. Angut pisuni pingasuni nakuusernermut, pinngitsaaliinermut aamma kiffaanngissusiiaanermut tunngasuni unnerluutigineqarpoq. Taanna pinngitsuunerarpoq, tigummigallarneqarnissamullu aalajangerneq Nunatta Eqqartuussisuuneqarfianut suliareqqitassanngortippaa.
Angut tunngaviusumik inatsit malillugu killisiorneqareersorlu ulluni 28-ni tigummigallarneqartussanngorlugu Eqqartuussisoqarfik Sermersooq sisamanngornermi aalajangerpoq.
Angut Nuummi pingasunngornermi tigusarineqarpoq, pisunilu pingasuni unnerluutigineqarpoq.
Angut 30-t missaanni ukioqartoq septembarimi ukioq kingulleq Ilulissani arnamut nakuusersimasutut unnerluutigineqarpoq, taassuma niaquatigut arlaleriarlugu tilluarsimavaa ilisimajunnaarneranik kinguneqartumik.
Tigummigallarneqarnissamut aalajangerneq suliareqqitassanngortikkaa
Angutip unnerluutigineqarnerani pisut allat marluk Nuummi sapaatip akunnerani matumani pisimanerarneqarput.
Angutip taanna arnaq nakuuserfigineqarsimasoq Nuummi suliffianut aasinnarlugu pinngitsaalillugu Nuussuarmi angerlarsimaffiliaassimaneranut unnerluutigineqarpoq.
Tassani unnerluussisussaatitaasut oqarnera naapertorlugu arnaq akunnerit marluk missaanni tigummisimavaa, tassanilu nakuusernissamut sioorasaaraluni pinngitsaalillugu atoqatigisimavaa.
Angut unnerluutinut tamanut pinngitsuunerarpoq.
Nunatta Eqqartuussisuuneqarfia angutip ulluni 28-ni tigummigallarneqarneranut aalajangernermut maanna aalajangiisussanngorpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...