Unnerluutigineqartoq toqutsisimasutut timimillu ileqqussaanngitsumik iliuuseqarsimasutut nassueruteqarpoq
Immiussaq, Ilullissani toqutsisimasutut unnerluutigineqartup qanoq toqutsisimanermik oqaluttuarneranik imalik eqqartuussivimmi marlunngornermi tusarnaartinneqarpoq. Unnerluutigineqartoq isummaminik pingasunngornermi allanngortitsilluni toqutsisimasutut timimillu ileqqussaanngitsumik iliuuseqarsimasutut nassueruteqarpoq.
Ilulissani siorna septembarip qaammataani toqutsisimaneq pillugu eqqartuusivimmi suliaqarneq pingasunngornermi naatsorsuutiginngisatut allamut sanguvoq.
Immiussaq marlunngornermi eqqartuussivimmi tusarnaartinneqarpoq, tassani unnerluutigineqartup oqaluttuaraa, 24-nik ukiulimmik qanoq toqutsisimanerluni timaanillu qanoq agguisimanerluni.
Immiussap eqqartuussivimmi tusarnaartinneqarnerata saniatigut YouTube aamma Facebook aqqutigalugit marlunngornermi unnukkut siammarterneqarsimavoq. Politiinit ilisimatitsissutigineqarpoq, namminneq isumartik malillugu siammarterineq pillaatississummik kinguneqarsinnaasoq.
Politiit Sermitsiaq.AG-mut uppernarsarlugu oqaatigaa, video toqutsinermi suliamut tunngassuteqartoq ippassaq Youtube aqqutigalugu saqqummiunneqarsimasoq.
- Politiinit sakkortunerpaamik kaammattuutigaarput, videomik pineqartumik tigummiaqaraanni qimagaasimasut eqqarsaatigalugit siammarterisoqannginnissaa, videop imaa toqusimasumut ilaqutaasunullu kanngunarsaataammat, vicepolitiinspektøri Lars Bjerregaard misissuinermi aqutsisuusoq oqarpoq.
- Politiit isumaqarput, videomik siammarterineq pillaatissiissutaasinnaasoq, taamaammat siammarterisoqarsimanera misissuiffigaarput, taanna erseqqissaavoq.
Pineqaatissiinissaq siuartinneqartoq
Illutungeriit maanna suliami pineqaatissiiisoqarnissaa utaqqimaarneqarpoq, naatsorsuutigineqarpoq ullumi pingasunngornermi nalunaaqutaq 15.00 pineqaatissiisoqassasoq. Kalaallit Nunaanni Politiini unnerluussisussaatitaasoq Marutha Thayapharan taamatut Sermitsiaq.AG-mut oqaluttuarpoq.
Unnerluutigineqartoq pisuussuteqarnerminik nassuerutiginnereeraluarluni sulia pillugu suli oqaaseqanngilaq. Taamaammat pineqaatissiisoqartinnagu uppernarsaatit saqqummiunneqarsimasut eqqartuussivimmit isummerfigineqassapput, unnerluussisoq oqaluttuarpoq.
Eqqartuussivimmi aamma pingasunngornermi pissutsit allat sisamat unnerluutigineqartumut unnerluussutaasimasut suliarineqarput, tassani pineqarlutik biilernermut allagartaqarani biilinik ingerlatsisimaneq il. il.. Tamatuma saniatigut unnerluutigineqartup inuttut atugai eqqartuussivimmi sammineqarsimapput, aamma unnerluussisoq illersuisorlu inaarutaasumik oqaaseqarsimallutik.
Unnerluutigineqartoq aallaqqaammut toqutsisimasutut timimillu ileqqussaanngitsumik iliuuseqarsimasutut pinngitsuuneraraluarpoq, pissutsinilu allani unnerluutigineqarnerminut pisuussuteqartut nassuersimalluni, pingasunngornermili isummani allanngortillugu pissutsini tamani pisuussuteqarnerarpoq.
Unnerluussisoq unnerluutigineqartup piffissaligaanngitsumik pineqaatissinneqarnissaanik piumasaqarsimavoq.