Qaasuitsoq
Unnerluut: Qaasuitsup Kommuniata meeqqat pisinnaatitaaffii unioqqutippai
Meeqqat illersuisuata sumiiffinni arlalinni misigisarsimavaa FN-ip Meeqqanut Isumaqatigiissutaa unioqqutinneqartoq
– Qaasuitsup Kommuniata nunaqarfiini illoqarfiinilu meeqqat atugassarisaat assigiinngitsorujussuupput. Tamatuma saniatigut nalinginnaasumik takusarsimavarput FN-ip meeqqanut isumaqatigiissutaanik toqqaannartumik unioqqutitsisoqartartoq, meeqqat illersuisuat kommunimut tikeraarnermi kingorna tusagassiorfinnut nalunaarutikkut paasissutissiivoq.
Tamatuma saniatigut meeqqanik suliniaqatigiiffiup MIO-p takusimavaa unioqqutitsinerit nunaqarfinni assigiinngitsuni assigiinngitsorujussuusut.
– Tamatumani innersuussutigaavut meeqqat illersorneqarnissaminnut ineriartornissaminnullu pisinnaatitaaffii, peqataanissamut pisinnaatitaaffiat kiisalu assigiissumik pineqartarnissaat, meeqqat illersuisuat nassuiaavoq.
MIO-p 2016-imi nunaqarfiit immikkut suliniuteqarfigissavai.