Unnerluussut: Toqutaasoq 94-eriarluni tukerneqartoq
Marsip naanerani angut 94-nit ikinnerunngitsunit tukkarneqarlunilu tukertarneqarpoq, tamatuma kingorna Nuummi umiatsialivimmut ajanneqarpoq.
Pinerluuteqartumut pasineqartumut unnerluussummi allakkami tamanna atuarneqarsinnaavoq, KNR nittartakkamini taama allaaserisaqarpoq.
Inuup pigisaanik aamma Pup Nuannip eqqaani Nuup umiatsialiviani nassaartoqarnerata kingorna, marsip 29-anni ullaakkut politiit inummit nalunaarfigineqarput. Kingorna politiit sikup ataani angut toqungasoq nassaaraat.
Maanna angut alla peqqaarniitsumik toqutsinermut unnerluutigineqarpoq.
Allagaq unnerluussut naapertorlugu toqutaasoq angut qaratsamigut aanaartoorsimanermi kingorna talliminik talerperlermik nissuminillu talerperlermik tamakkiisumik aqutsisinnaajunnaarsimasoq kiisalu balanceqarniarnermigut ajornartorsiuteqartoq, KNR allappoq.
Angut tukertarneqareernermini sissamut uniarneqarpoq, immamullu nakkarteriarlugu ipinissaata tungaanut immap iluaniiginnarnissaa saassussisup qulakkeersimallugu.
Suliaq eqqartuussivimmi decembarip 17-anni aamma 18-anni suliarineqassaaq, KNR ilisimatitsivoq.