Unnerluussut: Inniminniilliortarnerit akuersaarneqartarsimasut
Arnat qulit siulersuisunut saaffiginnissumminni inniminniilliortarnerit allaaserisimasaat, arlalitsigut Siumut allaffeqarfiani politikkerit ulluinnarni najuuffigisartagaanni ammasumik pisarsimapput. Arlaannaalluunniit unitsitseqqusilluni qisuariarsimanngilaq, naak illartarlutillu akuleruttarsimasut allaaserineqaraluartoq
Oqaatsitigut timikkullu kinguaassiuutitigut inniminniilliornerit arlalitsigut allanit isigineqartarsimapput. Tamanna arnat qulit Siumut siulersuisuinut allagaanni takuneqarsinnaavoq.
Allagarineqartut ilumuussappata, kinguaassiuutitigut inniminniilliornerit Siumut allaffeqarfiani politikkerit nuimasut ulluinnarni najuuffigisartagaanni ammaannartumik pisarsimapput.
Allakkanittaaq takuneqarsinnaavoq, partiimi qinikkat aqutsisullu inniminniilliorluni pissusilersortarnerit akuersaaginnarneqartarnerannut iliuuseqarnissaannik arnat ujartuisut.
- Isiginngitsuusaarunnaarlusi iliuuseqarniaritsi, ataaseq allappoq.
- Partiimi allatsip arnanut isiginneriaasia ernumanartupilussuuvoq, partiilu killiliinngippat assigiinnarpaa tamatumunnga akuersaartoq, alla allappoq.
Inniminniilliornera illaatigineqartartoq
Arnammi pineqartut allaaseraat, inniminniilliornerit arlalitsigut allat isigineranni pisartut. Toqqaannartumik allassimasoqanngilaq politikkerit nuimasut akuusarnersut, allaaserisalli takutippaat taamatut ileqqoqartoqartoq, ulluinnarni partiip allaffianiittaraanni takunngitsoorneqarsinnaanngitsumik.
- Qineqqusaarnerup nalaani taamaalluni allaffimmiittugut nulukkut tigunikuuvaanga allamik isigisoqartoq, ataaseq allappoq.
- Mikael Petersen allaffimmini angutinik arlalinnik 'ataatsimeeqateqartoq' suliassanut tunngassutilinnik aperiniarlugu iserfigaara. Tassanngaannaq kinguaassiuutinut tunngassutilinnik oqalulerpoq kusanaatsumillu nikanarsaalluni quisaarilerluni, allaat nammineq naleqartinneqartinnera sunnerlugu, taamaalimmallu susinnaajunnaarluinnartutut misigimalerlunga, alla allappoq.
Angutillu allat arlalitsigut annerusumik minnerusumilluunniit nikanartumik pissusilersornermut peqataasarsimarpasillutik.
- Oqarfigivaanga: Elskerinderilakkit, sumulluunniit aallarusukkaangavit oqaannartassaatit marluulluta feeriartarumaarpugut. Angutit allat pingasut isersimaqataapput illaannarlutillu, alla nassuiaalluni allappoq.
Peqataaqquneqartartut
Pisunut allanut tunngatillugit arnat allaaseraat, angutit allat inniminniillionernut peqataaqqullugit toqqaannartumik kaammattorneqartartut.
- Kanngusunngivilluni ammaannartumillu angutit allat Siumut allaffianiittut kaammattortarpai arnanut nikassaaqqullugit, arnat ilaat tamatuma ‘nalinginnaasuuneranik’ aamma oqaaseqartoq oqarpoq.
Siumut allaffeqarfiani silaannaq peqqinnanngitsoq tamanna piffissami sivisuumi atuussimarpasippoq.
Kinguaassiuutinut tunngatillugit oqaatsit atugaasupilussuit
Arnaq alla partiimi aqutsisunut allassimasut ilaginngisaat, oqaatsitigut inniminniilliortarnerit angutinit allanit illaatigiinnarneqartartut pillugit aamma nassuiaateqarpoq. Pisimasut taakku ukiorpassuit matuma siorna pisarsimapput.
- Mikael Petersenip imatut oqarfiginikuuaanga, 'Usorujussuarmik tunisinnaavakkit, 'sapaatip akunnerata sinnerani illaannalersillutit', taamatut oqarmat angutit allat najuupput illarlutillu, arnaq Sermitsiaq.AG-mut oqarpoq.
Oqaatsimi uteqqinnissai ajornakusoortippaa, erseqqissaatigaali oqaatsit taakkorpiaat atorsimagai.
Arnaq taanna naapertorlugu, kinguaassiuutinut tunngatillugit oqaatsit sakkortuut atorneqartartut Mikael Petersenip kisimi atorneq ajorpai.
- Kikkut tamarmik tusaasut oqallisigisarpaat, 'kina kujatsikkusunnersoq', taanna oqaluttuarpoq.
Politikkerit kinguaassiutitigut innimiilliortarnerannik innarliisarnerannillu paasissutissaateqaruit, oqaluttuarerusukkukkillu, taava Walter Turnowsky walter@sermitsiaq.gl imaluunniit +299 562248 aqqutigalugit saaffigisinnaavat.