Unnerluussut: Hashimit aningaasat anninniaraluarai
Angut inuusuttoq, apriilimi 2018-imi, unioqqutitsilluni 100.000 koruunit sinnerlugit Nunatsinnit anniseriaraluarsimanerinut unnerluunneqarpoq. Aningaasat silaannaarlugit poortukkanut marlunnut toqqorneqarsimapput, politiillu oqarnerat naapertorlugu haship 109 gramip tunineqarneraneersuupput.
Apriilip 24-anni 2018-imi nalunaaqutaq 10.24 nunatsinni mittarfiit ilaanni oqartussat iluatsitsinnguatsiarput.
Tassanimi angut Horsensimi inunngortoq, Danmarkimut angalanermini 109.850 koruunit nassassallugit siunertaqarsimasoq, allakkami unnerluussummi AG-p pissarsiarisimasaani atuarneqarsinnaavoq.
Angut aningaasarpassuit taakku aanngajaarniutinik iluanaarutinut attuumassutillit anninniarsimagai, unnerluussisussaatitaasut isumaqarput, taakku aningaasat 110.000 koruunit hashimit 109 graminit minnerunngitsunit tuniniaanermeersuusut politiit missingiuteqarmata.
Suliaq maajip naanerani Sermersuup Eqqartuussiviani suliarineqassaaq, eqqartuussiviullu aanngajaarniutineersuunerannik isumaqanngikkuni, angut Pinerluttulerinermut inatsit malillugu §111-mik unnerluutigineqarsinnaasoq unnerluussisussaatitaasut oqaatigaat.
Unnerluutigineqartuttaaq Namminersorlutik Oqartussat nalunaarutaat 2016-meersoq nioqqutissanik eqqussuinermut annissuinermullu tunngasoq unioqqutippaa, tassani Savalimmiunut Danmarkimullu angalanermi annissuinermut nalunaarsuinermik immersuinissaq inatsisitigut piumasaqaataasoq aalajangersarneqarpoq.
Allaaserisaq tamaat AG-imi uani atuaruk: