Unnerluussut: Hashi 16 kg pequttanut toqqorlugu anngiortumik eqqunneqarsimasoq
Angut hashimik pequttanut toqqorneqarsimasumik Nuummi imminut nassiussisimasutut eqqartuussivimmi eqqartuunneqarsimavoq. Politiit naapertorlugit, angut pineqartoq inuup toqoreersimasup aqqa passimini atorlugut arlaleriarluni angalasarsimavoq.
Hashimik anngiortumik eqqussisimaneq pillugu suliaq uissuummititsisimasoq ukiamut Nunatta Eqqartuussiviani suliarineqassaaq. Angut pineqartoq hashimik katillugit 16 kiluusumik 2015-imi maajip qaammataaniit 2019-imi decembarip tungaanut Kalaallit Nunaannut anngiortumik eqqussisarsimasutut unnerluutigineqarpoq.
Tamanna angummut unnerluussummi, Sermitaq.AG-mit takuneqarsimasumi atuarneqarsinnaavoq. Angut februaarip qaammataani eqqartuussivimmi pisuutinneqarluni eqqartuunneqarpoq, eqqartuussulli ingerlaannartumik suliareqqitassanngortissimavaa.
Politiit naapertorlugit hashimik anngiortumik eqqussuisimanermi, angut pineqartoq pequtinik Kalaallit Nunaanni najugaqarfimminut 16-eriarluni nassiussisarsimavoq, taamaaleriarlunilu Danmarkimiit Kalaallit Nunaannukartarsimalluni, pequttallu nassiussani suliffeqarfimmut assartuisartumut apuussassanngortittarsimallugit.
Hashi issiavimmi nassaarineqarsimasoq
Nassiussinerit tamaasa hashi minnerpaamik kiilumik ataatsimik oqimaassusilik pequttanut toqqorneqartarsimasoq, unnerluussummi allassimavoq. Politiit naapertorlugit, hashi anngiortumik eqqunneqartoq Kalaallit Nunaanni inunnut ilisimaneqanngitsunut tunniunneqartarsimavoq.
Hashimik assartuisarneraanerit 2020-mi septembarip qaammataani politiinit unitsinneqarput, taamanikkut Nuummi akitsuuserisut misissuineranni hashi nassaarineqarmat.
Akitsuuserisut taamanikkut hashi 1,272 grammimik oqimaassuseqartoq issiavimmut toqqorneqarsimasoq nassaaraat. Hashi nassaarineqartoq oqartussanit arsaarinnissutigineqarpoq, unnerluunneqartummullu tunniuteqqinneqanngisaannarluni.
Pappialat eqqunngitsut atorlugit angalasartoq
Pineqartup hashimik anngiortumik eqqussuisarsimasutut unnerluusaanermi saniatigut, passi peqquserluuteqarluni allanngortinneqarsimasoq atorlugu Kalaallit Nunaannut angalasarsimavoq.
Politiit naapertorlugit, unnerluutigineqartup angutip allap kuisinnermut allagartaa aamma napparsimalersinnaanermut sillimmasigaanermut allagartaa, nammineq assimik assitalik atortarsimavaa..
Angutip aqqa passimi atorneqarsimasoq, politiit naapertorlugit toqukkut qimagutereersimavoq.
Eqqartuussivimmi pineqaatissinneqarsimasoq
Unnerluutigineqartup aamma passi issiavik hashimik toqqorsiffiusimasoqsuliffeqarfimmit assartuisartumit tunniunneqarnissaanut atatillugu kiisalu Ilulissaniit Nuummut sinersortaammik angalanerminut atatillugu atorsimavaa.
Unnerluussisussaatitaasut angutip ukiuni pingasuni qaammatinilu arfinili pinerluuteqarsimasunut inissiisarfimmiittussanngortinneqarnissaa kiisalu 85.100 koruuninik, hashimik 1.272 grammiusumik passimillu eqqunngitsuusumik arsaarinnissutigiffigineqarnissaa anguniarpaat. Kalaallit Nunaanni Politiit Sermitsiaq.AG-mut ilisimatitsissutigaat, angut eqqartuussivimmi unnerluussutigineqartunut tamanut pisuutinneqarsimasoq.
Nunatta Eqqartuussiviata suliareqqitassanngortitaq novembarip qaammataa naalerpat suliarissavaa.