Unnerluussut: Biilinik aquttoq mianersuaalliorluni toqutsisimasutut unnerluunneqartoq imigassartorsimanerminit sunnertisimasimavoq
Biilinik aquttup imigassartorsimalluni biilersimasutut mianersuaalliorlunilu toqutsisimasutut unnerluutigineqartoq, arnamik biilit aqqutissaani nalasumik piaarinani apuisimasup, biilernerata nalaani aava imigassamik 1,61 promillemik akoqarsimavoq.
Biilinik ingerlatsisoq, imigassartorsimalluni biilinik ingerlatsisimasutut Tasiilamilu arnamik oktoberip arfernani 2019-imi mianersuaalliorluni toqutsisimasutut unnerluutigineqartoq, biilinik ingerlatsinermi nalaani aavani imigassaq 1,61 promillemut uuttorneqarsinnaasimavoq. Biilinik ingerlatsisinnaanissamut killigititaq tassaavoq 0,5 promille.
Suliaq alianartoq pillugu Sermitsiaq.AG annertunerusumik suli paasisaqarpoq, allagaatinik takunnissinnaaneq atorlugu unnerluussissut tigugamiuk.
Suliami paasissutissat imaapput:
- 6. oktober 2019 nalunaaqutaq 01.00 missaani, imigassamik aalakoornartulimmik ima annertutigisumik imereersimalluni biilernerani kingornaluunniit aavata imigassamik aalakoornartulimmik akoqarnerata 0,50 promille sinnersimallugu, ulloq taanna aammik misissugassatut tiguneqartup paasinarsisimmagu promille 1,61-iusoq, kiisalu soqqusaatsumik qajassuussinngitsumilli pissuseqarluni allanut akornutaannginnissaq navianartorsiortitsinnginnissarlu pinngitsoortikkamigit, unnerluutigineqartup (aporneqartoq, aaqq.) biilit aqqutissaanni nalasoq, aporamiuk ajoquserlugu.
Imigassartorsimalluni biilinik ingerlatsisimasutut unnerluussissut taama allassimavoq, taassuma saniatigut mianersuaalliorluni toqutsisimasutut aamma unnerluutigineqarpoq.
Qaammatini arfineq-pingasuni inissiisarfimmeeratarsinnaasoq
Unnerluussissut naapertorlugu biilinit aporneqartoq Tasiilami napparsimmavimmukaanneqarsimavoq, aporneqarnermili kingorna ajoquserneqarnerminit toqusimalluni.
Biilinik ingerlatsisimasoq taamaammat aamma unnerluutigineqarpoq ”pisumi sakkortuumi imigassartorsimalluni biilernermut atatillugu, mianersuaalliornikkut (aporneqartoq, aaqq.) toqukkamiuk”.
Unnerluutigineqartoq Sermersuup Eqqartuussiviani eqqartuunneqassaaq, Tasiilami eqqartuussiveqarfiup illuutaani februarip 24-ani 2020-mi.
Unnerluussisussaatitaasup piumasaraa:
- Unnerluutigineqartoq qaammatini arfinilinni – arfineq-pingasuni inissiisarfimmiittussanngortinneqassasoq
- Biilinik ingerlatitsisinnaanermut allagartaanik ukiuni marlunni pinngitsoorani arsaarinninneq
- Akiligassiineq, sapaatit akunneri pingasut akissarsiaasa naligannut, tassa 39.546,16 koruunit
- Ilanngullugu taarsiivigineqarnissamik piumasaqaateqartoqarnissaa sillimaffigineqassaaq.