Unnerluussisussaatitaasut pisortaat: Facebookikkut inuttarsiuineq unitsinneqarli
Nuummi sapaatip akunnerani kingullermi tuniluuttoqalermat, inuit attaveqaqatigiittarfiisigut kikkut qanoq iliornersut malittarisassanillu sunik unioqqutitsinersut pillugit sakkortuumik oqallittoqalerpoq. Unnerluussisussaatitaasut pisortaata kaammattuutigaa, Facebookikkut tusatsiakkat unitsillugit, unnerluussutigisaq eqqortuuppat politiinut nalunaarutigisaqqullugu.
Nuummi piffissami kingullermi tuniluuttoqarneranut atatillugu malittarisassanik unioqqutitsisoqarsimanersoq pillugu suli paasisaqartoqanngilaq. Facebookimili oqaaseqaatigineqartut atuaraanni assigiinngitsutigut taamaassorinnittoqarpoq.
Aamma Munck Gruppenimi sulisut pisumullu attuumassutillit pillugit qanoq kinguneqartitsisoqartariaqarneranut isummersortut arlaqarsimapput.
Kalaallit Nunaanni Politiini unnerluussisussaatitaasut pisortaat Morten Nielsen silatusaaqqusivoq.
- Misilittakkakka malillugit, Facbookikkut oqaaseqartartut suliami pissusiviusunik tamank paasisimasaqaratik oqaaseqartarput, oqaaseqaatigineqartullu allanit tusarsimasaannik tunngaveqakkajuttarlutik, taanna oqarpoq.
Inatsisinik unioqqutitsisoqarsimaneranik pasitsaassaqarneq politiinut nalunaarutigineqarli
Unnerluussisussaatitaasut pisortaata kaammattuutigaa, inatsisinik unioqqutitsisoqarsimaneranik ernummatigineqartut oqartussamut eqqortumut nalunaarutigeqqullugit.
- Inatsisinik unioqqutitsisoqarsimasoq ilisimagaanni Facebooki oqalliffissaanngilaq, politiinut nalunaarutigineqassaaq, taanna oqarpoq.
Morten Nielsenip Sermitsiaq.AG-mut ilisimatitsissutigaa, politiit coronamut atatillugu killilersuutinik unioqqutitsisimasinnaasut pillugit misissuiuartut, aamma suliamik missugassaqarluni oqaatigaa.
- Tunillatsittoqarsimasoq ilisimatinneqaraangatta, tunillatsissimasup attavigisimasaanik ujaasinissaq siulliullugu suliassarisarparput. Aatsaat tamanna isumagineqareerpat, inatsisinik unioqqutitsisoqarsimanersoq misissuiffigineqartarluni. Pisumut matumunnga atatillugu tamanna maannakkorpiaq ingerlapparput, unnerluussisussaatitaasut pisortaat oqarpoq.
Det er noget vås
Morten Nielsenip nassuiaatigaa, tunngaviatigut aqqusinermi ajutoortoqarnerani suliassaq siulleq assigiinnarpaa. Siullertut angallattut unitsinneqassapput, ikiueqqaarlunilu, aatsaat taakku isumagineqareerpata, angallannermi inatsimmik unioqqutitsisoqarsimanersoq msissorneqartarpoqt.
Taassuma oqaatigaa, tuniluuttoqarnera inatsimmillu unioqqutitsineq sanillersuunneqarsinnaanngitsut.
- Arlaat tunillatsissimappat, taava malittarisassanik unioqqutitsisoqarsimasutut oqartarneq asuli oqalunneruvoq. Nappaat tuniluutiasuararsuaq pineqarpoq, taamaammat malittarisassat inassuteqaatillu tamarmik malinneqaraluarpataluunniit tuniluuttoqalersinnaavoq.