Unnerluussissut: Angutip arnaq innarluutilik pinngitsaaligaa
Angut arnamik pisup pinerani 28-nik ukioqartumik pinngitsaaliilluni atoqateqarsimasutut pasineqarluni eqqartuunneqassaaq. Arnaq skizofreneqartutut ineriartornermigullu akornuteqartutut nalilerneqarsimavoq.
Arnamik ineriartornermigut akornuteqartumik innarluutilimmik atornerluineq pillugu suliaq Nuummi eqqartuussivimmi suliarineqangajalerpoq.
Suliami angut 31-nik ukiulik arnamik 9. marts 2021-mi nal. 9 aamma 10 akornanni Nuummi Nuussuarmi pinngitsaaliilluni atoqateqarsimasutut pasineqarpoq.
Arnaq skizofreneqarpoq aamma sianissutsimigut 12-13-inik ukiulittut nalilerneqarsimavoq.
Arnaq pinngitsaalineqarnermini 28-nik ukioqarpoq, unnerluussissummi tamanna atuarneqarsinnaavoq.
Angutip arnaq atoqatiginerata kingorna tissassartissimagaa, tassani aamma atuarneqarsinnaavoq.
Pinngitsaaliinermut unnerluussissutip saniatigut angut aamma aggustimi 2022-mi pisumut atatillugu nakuusersimasutut sioorasaarisimasutullu pasineqarpoq.
Unnerluussisussaatitaasup angut pasineqartoq qaammatini 12-ni inissiisarfimmiinnissaa piumasaraa, suliaq eqqartuussivimmi 24. april suliarineqassaaq.