Unioqqutitsilluni imigassamik tuniniaanerit politiiniit misissorneqartut
Imigassap matoqqatinneqarnerani politiit unioqqutitsilluni tuniniaasimanermi suliassanik aallartitsipput. Inuimmi unioqqutitsillutik imigassamik tuniniaasimapput. Unioqqutitsilluni imigassamik tuniniaanermi politiit misissuinerani suliassat katillugit 17-iupput.
Angerlarsimaffinni immiornerit, angerlarsimaffimmiit imigassamik tuniniaaneq Facebookilu aqqutigalugu tuniniaanerit imigassap matoqqatinneqarnerani politiinut ulapaartitsisimapput. Kommuninimi tallimaasuni sisamat imigassamik matoqqagallartitsinikuupput.
Unioqqutitsilluni imigassamik tuniniaasimasut 1.000 koruunimik akiligassinneqarsinnaapput, tuniniaanermini aningaasat tigusai tamaasa tiguneqarsinnaapput imigassallu arsaarinnissutigineqarsinnaallutik.
- Covid-19-ip tuniluunnerpaaffiani imigassamik tuniniaasinnaannginneq sassaalliisinnaannginnerlu politiinut peqqinnissaqarfimmullu ulapaarnermik kinguneqartitsisussaanngikkaluarpoq. Imigassap matoqqatinneqarnerani innuttaasut imigassamik tuniniaasinnaasimanerat ajornartorsiuterujussuartut Kalaallit Nunaata politiianiit isigaarput. Taamaattumik unioqqutitsillutik tuniniaasimanut tunngatillugu suliassat arlallit misissusallugit politiiniit aalajangerpugut, politikommisæri, Jan Geisler oqarpoq.
Facebook-imi eqimattat matoqquneqartut
Facebook aqqutigalugu eqimattat assigiinngitsut iserfigineqarsinnaasarput. Eqimattat ilaanni imigassamik tuniniaasoqartarpoq pisisoqartarlunilu. Tamannalu unioqqutitsinerusoq politiit erseqqissaatigaat Facebook gruppimillu pilersitsisimasut annertuumik akiligassinneqarsinnaasut erseqqissaatigalugu.
- Facebookimi gruppit arlallit matuneqarnissaat politiiniit piumaffigisimavagut. Taakkunani unioqqutitsinniluni imigassamik tuniniaasoqartartoq pasitsaappagut. Imigassanik nioqquteqarsinnaanermut akuersissuteqarnani tuniniaasimagaanni imerniartarfiit inatsisaanik unioqqutitsineruvoq, tamannalu annertuumik akiligassinneqarnermikkinguneqarsinnaavoq. Politiit tusagassiuutinut nalunaarummini allapput.
Politiit suli misissuipput suliassallu suli malinnaavigalugit.