Unicef: Paasissutissat pingaarutillit katersorneqassapput
FN-ip meeqqat pillugit ikiuiniaqatigiiffiaata Tasiilami kinguaassiutitigut pinerliisarnerit pillugit politiit nalunaarusiaminni inassuteqaataat tapersersorpai
- Nalunaarusiaq atuarlugu nuanninngilaq, pisariaqarporli. Minnerunngitsumik paasissutissanik katersinissaq pingaaruteqarluinnarpoq.
“Tasiilami meeqqat inuusuttuaqqallu 2014-imit 2018-imut kinguaassiuutitigut atornerlunneqarsimasut pinaveersaartitsinissamullu suliniutissatut innersuussutit” pillugit politiit nalunaarusiaat, ataasinngormat saqqummiunneqartoq pilugu, Sara Olsvig, Kalaallit Nunaanni Unicefip suliniutinut pisortaa oqarpoq.
- Politiitulli isumaqarpugut, Kalaallit Nunaanni meeqqanik inuusuttuaqqanillu kinguaassiuutitigut atornerluisarnerit suna ilisarnaatigineraat pillugu pitsaanerusumik ilisimaqarnissatsinnut tunngavissanik peqanngilagut. Meeqqat inuusuttuaqqallu pillugit aaqqissuussaasumik kisitsisitigut paasissutissat annertuumik amigaataapput. Kisitsisitigut paasissutissat pitsaanerusumik suliniuteqarnissamut aamma suut iluaqutaanersut misissorneqartarnissaannut qularnaarinneqataasinnaasut, Sara Olsvig erseqqissaavoq.
Piffissaq ungasinnerusoq eqqarsaatigalugu peqqissaartumillu suliniuteqarnissat
Unicefimit pingaartumik meeqqat atuarfianni sulilu atualinngitsunut tunngatillugu pisinnaatitaaffinnut sammitinneqarnerusumik suliniuteqarnissamik inassuteqaat tamakkiisumik tapersersorneqarpoq.
- Nunami tamarmi, meqqat atuarfiini meeqqat pisinnaatitaaffii annertunerujussuarmik ilinniartitsissutigineqartariaqarput. Pisinnaatitaaffinnik ilisimasaqarneq akiuulluarnerusinnaalersitsisartoq pitsaanerusumilu atugaqalersitsisartoq, misilittakkat tamarmik takutittarpaat. Meeqqalli kisimik pisinnaatitaaffimminnik ilisimasaqartussaanngillat, tamannami aamma inersimasunut atuuppoq. Tamaammat pisariaqarpoq, piffissaq ungasinnerusoq eqqarsaatigalugu peqqissaartumik suliniuteqarnissaq, meeqqanik sullissisut inersimasullu meeqqat pisinnaatitaaffiinik paasinninnissaat, aamma pisinnaatitaaffiit aqqutigalugit meeqqanut qanoq isiginnittarnissaq, tassunga ilanngullugit meeqqat timaannik meeqqalu killiliisarnerannik ataqqinnittarnissaq anguniarlugit, Sara Olsvig, Kalaallit Nunaanni Unicefip suliniutinut pisortaa oqarpoq.
Paasissutissanik kisitsisinillu katersisarneq
Unicef, meeqqat atugaat peqqissusaallu pillugit nunarsuarmi paasissutissanik toqqorsiviit annersaraat, paasissutissanillu katersinissaq nalunaarusiami tunngavigineqartoq pingaaruteqarluinnarpoq:
- Kalaallit Nunaanni meeqqanut inuusuttuaqqanullu tunngasutigut suliaqarfinni unammilligassaq annertooq tassaavoq paasissutissanik amigaateqartoqarnera. Pisortat oqartussaaffii tamarmik peqatigiillutik paasissutissanik peqarnissarput qulakkeertariaqarpaat, pingaartumik meeqqanut inuusuttuaqqanullu tunngassutilinnik. Paasissutissat kisitsisillu ukiorpassuit ingerlaneranni katersorneqarsimasut, sunik pisariaqartitsisoqarneranut, aamma suliniuterpassuit sunniuteqarsimanersut paasineqarnissaannut tikkuussisussaapput, Sara Olsvig oqarpoq.