nalunaarusiaq
Unicef: Danmarkimi meeqqat piitsut 13.000-nik amerleriarsimapput
Unicefimi kisitsisit nutaat: Danmarkimi meeqqat quliugaangata ataaseq piitsuusarpoq. Meeqqat piitsut 2008-mit 13.000-nik amerleriarsimapput
Danmarkimi meeqqat piitsut amerliartorput. FN-ip meeqqat pillugit aaqqissuussinera Unicefip nalunaarusiaani atuarneqarsinnaavoq.
Meeqqat ukioqanngitsunit 17-it tikillugit ukiullit 10,2 procentii piitsuusut nalunaaruteqarpoq, tassa meeqqat quliugaangata ataaseq piitsuusartoq oqaatigineqarluni. 2008-mut sanilliutissallugu 13.000-nik amerleriarsimapput. 2008-mit 2012 tikillugu kisitsisit malinneqarput.
Danmarkimi Unicefimi pisortap Steen M. Andersenip ineriartorneq ajuusaarutigaa.
- Danmarkimi meeqqat quliugaangata ataaseq piitsuusarpoq. Nunaasussaagaluarpugut ineriartortut. Nunani avannarlernut sanilliutissagutta nuannaarutissaqanngilagut, Steen M. Andersen Ritzauimut oqarpoq.
Nunani pissarissaartut 41-ni misissuisoqarpoq. Danmarki 24-tut inissisimavoq, Norge tallimaattut, Finland arfineq pingajuattut kiisalu Sverige 13-attut inissisimavoq.
Nunani 41-ni taakkunani meeqqat piitsuunerat amerleriarsimavoq pingasuni.
Nunani 41-ni taaneqartuni meeqqat piitsut 2,6 millioninit 76,5 millioninut amerleriarsimapput. Aningaasaqarnerup ajornartorsiutigineqarnera tassunga pissutaaqataavoq.
Unicefimit siunnersuutigineqarpoq nunani socialpolitikki annertunerulertariaqartoq meeqqat piitsunngortarnerat anguniarlugu.