Unescomit eqqissisimatitaq: Kommunit sumiiffiit eqqissisimatinneqartut namminneerlutik allanngortissinnaavaat

Ilisimatusarnermut Avatangiisinullu Naalakkersuisoqarfiup ukioq manna maajip qaammataani paasivaa, Avannaata Kommunia Nunarsuarmiunut kingornussassangortinneqarsimasup killeqarfiani, Ilulissat Kangiani, sanaartornissamik illoqarfiullu ineriartortinneqarnissaanik kissaateqartoq.

Naalakkersuisoqarfik Sermitsiaq.AG-mut taamatut paasissutissiivoq. Borgmesterimmi Palla Jerimiassenip neriuutigaa, Ilulissat kujataata tungaani, Unescomit eqqissisimatinneqartumi illoqarfik ineriartortinneqassasoq.

Kommunip kissatai

Ilisimatusarnermut Avatangiisinullu Naalakkersuisoqarfik tassunga atatillugu Avannaata Kommunianut allagaqarsimavoq, tassani kommunip kissaateqarnera naalakkersuisoqarfiup paasisinnaanerarsimavaa

- Ingerlatassanut pitsaasunut, nunarsuarmiunut kingornutassiami pinngortitamik nunallu kusanassusaanik naammaginartumik illersuinissamut peqatigitillugu kommuni ineriartortitassatut kissaatigisaanik sapinngisamik qulakkeerinnittunut peqataarusuppugut, naalakkersuisoqarfimmi pisortaq Mette Skarregaard Pedersen oqarpoq.

Kommunip pilersaarutai

Ilisimatitsissutigineqarpoq killeqarfiliussani sanaartornissamut aalajangersakkat kommunip pilersaarutaani aalajangersarneqarsimasut, pilersaarusiornissamullu piginnaatitsissut taamaalilluni Avannaata Kommuniani kommunalbestyrelsimiilluni.

Kommunip pilersaarutaani aalajangersakkat malillugit illoqarfimmut qanittumi imaluunniit nunatap eqqissisimatititap killeqarfiani sanaartornissaq aamma illoqarfimmik ineriartortitsinissaq maannakkorpiaq inerteqqutaavoq.

- Killeqarfiliussani sanaartorlunilu illoqarfimmik ineriartortitsiniaraanni, eqqissisimatitaqarfinnut tunngatillugit kommunip pilersaarutaani aalajangersakkat kommunip pilersaarusiornerani allanngortinneqarsinnaapput. Tassa kommuni tassaavoq eqqissisimatitaqarfinnut tunngatillugit nutaanik aalajangersagaliornissamut oqartussaasoq, Mette Skarregaard Pedersen ilisimatitsivoq.

Kommunimit tusagaqarsimanngitsut

Killeqarfiliussani marluusuni nunap pinngortitallu naleqassusaasa suussusersineqarnissaannik naalakkersisoqarfik kommunimut ikiuukkusussimavoq.

- Pingaaruteqarpormi killeqarfiliussani sanaartornermik allartitsinerup Ilulissat Kangia pillugu Nunarsuarmiunut kingornussassiamik misigisaqartarnissamut ajoqusiinanilu akornusiinnginnissaa, Mette Skarregaard Pedersen oqarpoq.

Ilisimatusarnermulli Avatangiisinullu Naalakkersuisoqarfik Avannaata Kommunianit sanaartornissamik kissaatigisat pillugit - tassa qanoq ittunik sanaartortoqarusunnersoq imaluunniit sumiiffimmi aalajangersimasumi sanaartortoqarusunnersoq tusagaqarsimanngilaq.