UNESCO Nunatsinni: Nunatsinni nunarsuarmioqatigiinnut kingornussassanngortitat pingaarutilimmik oqaluttuartuupput
FN-ip Nunarsuarmioqatigiinnutkingornussassanngortitsisarnermut isumaqatigiissutaa ukiunik 50-inngortorsiorpoq. Nunatsinnilu nunarsuarmioqatigiinnut kingornussassanngortinneqarsimasut pingasut allattorsimaffimmut ilanngunneqarnermikkut pitsaasunik atugassaqartinneqalersimallutik, UNESCO-p Nunatsinni sumiiffinni aqutsisui oqarput.
UNESCO-p Nunarsuarmioqatigiinnut kingornussassanngortitsisarnermut isumaqatigiissutaa
ukiunik 50-inngortorsiorpoq.
Nunatsinni nunarsuarmioqatigiinnut pingasunik kingornusassanngortitaqarpoq, tassa nunarsuarmi kingornussassanngortitanik katillugit 1154-iusunit Kujataani aamma Qeqqani Aasivissuit Nipisallu Ilulissallu Kangiat kingornussassanngortinneqarsimapput.
Allattorsimaffimmut ilanngunneqarnerisigut Kalaallit Nunaanni sumiiffiit pineqartut kulturikkullu kingornussat allanngutsaaliugaapput.
Nunatsinni Kingornutassiaqarfiit ilaaffigisaat Nunarsuarmioqatiginnut Kingornutassanut
Isumaqatigiissutaata kingornutassiaqarfitta Kulturikkut Pinngortitallu nunarsuarmioqatigiinnut immikkullarissumik isumaqarnera tamattalu kingornussassatut piujuartinnissaanut illersornissaanullu pisussaaffilerpaatigut.
Takornarianit takuniarneqarusuttartut
Ilulissat Kangia nunarsuarmioqatigiinnut kingornussassanngortinneqarsimasoq takornarianit ornigarluarneqartartuuvoq:
- Ilulissani Kangiata kusanarluinnartuunerani tamatta malugaarput. Aasakkut ukiukkullu
takornarissat amerliartuinnartut Sermep Kujalliup iluliarsuit anisitai assigiinngilluinnartut
takorniartalerpaat. Piffimmi taamaattumi maanna ukiuni 20-inngulersuni UNESCOp killeritaani killeritaatalu illersuutitut killerititaanni (bufferzone) sulinitsinni pingaarluinnarpoq piujuartitsinissaq, Ilulissat Kangiani Site Manageri Bo Albrechtsen oqarpoq.
Illukut piniariartarfiillu oqaluttuassartaat
Kujataani illukoqarpoq nunarsuarmiunut kingornussassanngortitsinerup kingorna allanngutsaaliorneqartunik. Sumiiffimmi illukorpassuaqarpoq Kalaallit Nunaata oqaluttuassartaanut ilaasunik.
- Oqaluttuarisaaneq illukut assigiinngitsut atorlugit, soorlu inuit qallunaatsiaallu illukui,
maannakkullu nunalereriaaseq ulloq manna tikillugu qallunaatsiaat atorsimasaattut atorneqartoq, Inuillu piniariartarfigisimasaat atorlugit takutissinnaavarput. Taakku kingornussassaraagut piujuartinnissaanik pingaarluinnartut ilutigitillugulu nunamik atuisut ineriartortuarnissaanik periarfissiinissaq, taama oqarpoq Kujataani Park ranger Else Bjerre.
Aamma Qeqqata Kommuniani Aasivissuit – Nipisat Nunatsinni piniariaatsinik atorneqartarsimasunik oqaluttuassartaqarput.
- Nunarpassuit assigalugit Nunarput nunarsuarmioqataallualernikuuvoq, nunarsuarmioqatigiinnullu kingornussatut ilanngunneqarnitta nunarsuarmi ilisimaneqarnerulernissamut periarfissippaatigut. Taamaalillutalu aamma kulturerput piniariaaserpullu atajuartinnissaanut paarilluarnissaanullu ilisimaneqarlualersinnaanissaanut saniatigullu soorlu silaannaap allanngoriartornera eqqarsaatigalugu aamma uloriarnartorsiortinneqarsinnaaneranut ukkassinissatsinnut periarfissulluta, taama oqarpoq Aasivissuit - Nipisani Site manager, Paninnguaq Fleischer-Lyberth.
Nunat akornanni kulturikkut kingornussassanik illersuiniarluni sulissuteqaqatigiinnissaq pillugu eqqarsaat Sorsunnersuarmi siullermi aseruatiterinerujussuup kingorna pilerpoq.