Unammisartut nunanut allanut nuunnissaat Jakob Larsenip kajumissaarpai
Assammik arsarnerup tungaatigut unammisartutut siuariartussagaanni nunani allani unammisartuuneq kalaallinit ujartuiffigineqartariaqartoq Jakob Larsen isumaqarpoq
- Unammisartugut maannakkut assiliseqattaarlutillu autografinik atsioqattaarput. Tamanna takullugu nuanneq. Tassa taanna pissutaalluni maanga sungiusariarpugut.
Kalaallit arnat assammik arsarlutik nunanut allanut unammisartut Nykøbing Falster Håndboldimut unammereermnermi kingorna Jakob Larsen Sermitsiaq.AG-mut oqarpoq. Taanna Nykøbing Falster Håndboldimi sungiusaasuuvoq.
Unammisartutut inuuneq
- Unammisartut imminnut sungiunnissaat anguniarlugu maanngarpugut, tamannalu anguarput. Aamma assammik arsarnerup soqutigineqarnerulernissaa anguniarlugu maanga sungiusariartorpugut, tassami unammisartukka qanoq timersuummut pimoorussitiginerat takutikkusullugu aamma maanngaratta.
- Kalaallit arnartaat ukiuni tulliuttuni sungiusarluariarunik, misilittagaqarnerulerunik kiisalu tapersersortissaminnit tapersersorneqarluariarunik pitsassuanngortussaapput. Ingerlalluarnissaannik kissaappakka, nuannaarutigaaralu unammisartukka nassarlugit maanngarsinnaagama. Sapaatiuppat unammeqqittussaavugut, kisianni oqarsinnaavunga maanngarnissatsinnut anguniakkagut angoreeratsigit, Jakob Larsen oqarpoq.
Nunanut allanut unammisartuulernissamut kajumissaarut
Naak unammisartui nunanut allanut unammisartunut isertitanik 21-nik ajugaagaluarlutik kalaallit arnartai nersualaarpai.
- Qanorluunniit unamminermi kinguaqqatigigaluaraangamik tunniutiinnanngisaannarput. Kisianni aamma Nunatsinni unammineq misilittagaqarfiginngilaat, tv-ikkut aallakaatitamik unamminermi misilittagaqanngillat, taamaattumik pissangalaartut takuneqarsinnaavoq. Oqinnerusumik unamminissaat sapaatiuppat qularinngilara, maannami misilittakkanik katersuipput.
- Unammisartunut siunnersuuteqassasuuguit suna siunnersuutigissagaluarpiuk?
- Inuusuttuullutillu piumassuseqarluariarunik siunnersorsinnaavakka nunanut allanut nuunnissaat siunnersuutigerusuppara. Tassani aatsaat siuariartortoqarsinnaavoq. Nunatsinni najugaqarluni unammisartutut ineriartorsinnaaneq killeqarpoq. Danmarkimi unammisartunngornissaq siullertut siunnerfigineqarsinnaavoq, tassanngaannit Frankrigimut, Tysklandimut nunanullu allanut assammik arsarnerup tungaatigut ingerlalluartunut misiliisoqarsinnaalluni.
- Nunanut allanut nuukkusunngitsut sukataarlutik sungiusartuartariaqarput, nukkassartarlutik aammalu inooriaaseq paaralugu ingerlasariaqarlutik. Nunanut allanut unammisartuni unammisartut tallimat missaat nunanut allanut nuussinnaagunik nunanut allanut unammisartunut iluaqutaasorujussuussaaq, taamaattoqassappat VM-inut tulliuttunut arlalinnut peqataanissaat qularnassanngilaq, oqaluttuarpoq.
Timersuut soqutigineqarluartoq
- Unammisartutit ilagalugit Nuummiinnerit ilinnut qanoq ippa?
- Immikkuullarilluinnarpoq. Ukioq kingulleq Japanimiippugut nuannisaqaluta, kisianni tassani angalanerput uannut immikkuullarissuteqanngilaq. Maani peroriartorpunga, taamaattumik uannut isumaqartorujussuuvoq maanga angalanerput. Arsartukka maani nuannisarlutillu misigisaqarluartut takuakka, tamanna nuanneqaaq, akivoq.
Assammik arsarneq soqutigineqartorujussuusoq unamminerup takutikkaa oqaatigaa.
- Danmarkimi sungiusaatigalugu unammigaangatta inuit 50-75-it isiginnaariartarput, maanili inuit 650-it sinnerlugit isiginnaariarput. Timersuut qanoq soqutigineqartiginersoq tassuuna erserpoq, Jakob Larsen oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...