Panu P. Grønvold, assammik arsartartuni nunanut allanut unammisartoq, VM-imut anngunniunnissamut ulloq ataasiinnanngortorlu unammeqataasinnaajunnaarpoq.

Assammik arsartartut kattuffiata, TAAK-ip tamanna tusagassiorfinnut nalunaarutigaa.

Nunanut allanut unammisartoq sungiusarnerit ilaanni talimigut napivoq, unamminernilu peqataasinnaajunnaarluni.

- ”Soorunami tamatta uggoreqaarput Panup peqataasinnaajunnaarnera, piginnaasai immikkuullarissut aammalu sunniuteqarsinnaanera tamanut minnerunngitsumik unammisaqattaarnermi atorluarsinnaasaraluagut uggoralugit. Panu ajoqusernini qaangerluarnissaanut tamanik ajunginnerpaanik kissaapparput, elite udvalgimi siulittaasoq Arnanguak Steenholdt oqarpoq.

Unammeqataasussaq nutaaq

Nukaaka P. Lyberth, Panu P. Grønvold taarserlugu unammeqataasussanngorpoq.

- Nukaakap Panup piginnaasai taarsersinnaanngilai, kisiannili piginnaasaqarpoq allanik unammersuarnerni sunniuteqarluarsinnaasunik aammalu atorluarsinnaasatsinnik. Nukaaka piareersanerni tamani peqataanikuuvoq taamaasilluni iligiinnut iserluareersimalluni, sungiusaasoq Anders Friis oqarpoq

Unammineq siulleq ataasinngornermi 5. juni nal. 17.00 aallartissaaq, Cuba Mexicolu unammissallutik. Nunarput Canadalu unammissapput nal. 20.00.