Unammilluni timersuut nutaanik ilaasortassarsiortoq
Nuuk Aikido Klub akeqanngitsumik sungiusarnissamut qaaqqusivoq soqutiginnittunit Japanimiut akiuuteriaasiat nutaaliaasoq ilisimaneqalersinnaaniassammat
Timersoqatigiiffik ullumikkut marlunnik sungiusaasoqarpoq marlunnillu ilinniartoqarluni, tamaaattumillu Nuummi timersoqatigiiffiit minnerpaartaasa ilagisimassallugu. Tamannali Japanimiut akiuuteriaasiata nutaaliaasup, ilaatigut panaq qisuillu amitsut atorlugit sungiusarfiusartup, tunniusimaffiginissaanut kajumissuseqarfiginissaanullu killiliinngilaq.
Aikidop aallaavia
Aikido unnuap ataatsip ingerlanerinnaani ilikkagassaanngilaq. Aalariaatsitigut pissusilersuutit inuunerlu naallugu iserfigiartuaarneqartarput, tamatumanilu aalariaatsit aqussinnaanissaat eqqumaffigineqartuaannartarluni. Oqaaseq aikido nukiup oqimaaqati-giissup aqqutaatut nutserneqartarpoq. Timersuut akiuuteriaasiusoq Japanimit aallaaveqarpoq, samuraillu akersuuteriaasiannik kusanartumik ineriartor-titseqqiinerulluni. Aikido Japanimiumit Morehei Ueshibamit ineriartortinneqarsimavoq, taannalu amerlanertigut taaneqartarpoq O-sensei, isumaqartoq ilinniartitsisoq ataqqinartoq. Timersuut jiu-jitsumik aallaaveqarpoq, piffissamilu 1930- kkunnit 1969-imut, tunngaviliisup toqunissaata tungaanut, ineriartortinneqarluni.
Aalariaatsit aqunneqartut
Akersuunnermik timersuummi aalangeeriaatsit igitseriaatsillu aqqutigalugit aaqqiagiinnginnerit pitsaaliornissaat pineqarpoq. Aalariaatsit tamarmik panaannermik aallaaveqarput. Tunngaviusumik periuserineqartumi tamarmiusumi tillueriarnerit, anaaseriarnerit assigisaasalu pitsaaliornissaat tamakkunanilu nukik atorneqartoq iluaqutigalugu akerlerisaq soriarsinnaajunnaarsinneqartarluni aalangeerneqartarluniluunniit. Taamaattumik aikidomik aallussisoq pikkorissoq nukittuujusariaqanngilaq, periaatsitigulli pikkorissuusariaqarluni. Aalariaatsit toqqaannartuusarput aammali saarliartuaartuusarlutik. Periaatsit inissikkumallugit ilaatigooriarluni kigaatsuararsuarmik sungiusartoqartarpoq.
Sakkumik atuineq
Aikidomi sungiusarnerup ilangaatsiarujussua panamik, savissuarnik qisunnillu amitsukujuunik sakkoqarluni ingerlanneqartarpoq. Tamakkua qaffasissutsip aalajangersimasup angunissaata tungaanut qisuusarput tamatumalu kingorna sakkut taamaattut atorlugit sungiusartoqalersarluni. Sakkunik atueriaaseq, assaat atorlugit sakkunik pakkeeriarnerit assigiinngitsunillu sakkulisaqatigiilluni akersuunnerit sungiusarneqartarput. Sungiusarneq sakkortoortoqaranilu ajoqusernartuunngilaq, suut tamarmik aqunneqartumik pisarmata. Tamanna sungiusarnermut nalinginnaasumik atuuppoq. Akersuunnermik timersuummi toqqaannartumik tilluisoqartanngilaq toqqaannartumillu sakkortuumik attuisoqartarnani.
Misileerusukkaanni
Imminut illersorsiaaseq sukumiisoq aikido misilissallugu sapiissuseqaraanni kinaluunniit USK-imi niviarsiaqqat eqaarsaartarfiannut ataasinngornikkut pingasunngornikkullu nal. 16.00-imit 18.30-mut tikilluaqqusaasorujussuuvoq. Inersimasut tamarmik tikilluaqqusaapput sungiusarnerlu akeqanngilaq. Klubbip ilaasortaanit neriuutigineqartorujussuuvoq akersuunnermi timersuut taanna kiagualaarnarluartoq arlaqarnerusunit soqutigineqalissasoq. Klubbi Kalaallit Nunaanni kisiartaavoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...