aatsitassarsiorneq
Unammillersinnaannerussaagut
Nunatsinni nalornineq allanngorartumillu ingerlatsinneq aningaasaliisartunut eqquisut, Naalakkersuisuni siulittaasuusimasoq, Kuupik Kleist, aatsitassarsiornermut siunnersuisartuusoq oqarpoq
Kalaallit Nunaat nunat aatsitassarsiorfissatut pilerinartut allattorsimaffianni kinguariarujussuarpoq.
Kalaallit Nunaat normu 7-itut inissisimanerminit ukiut marluk ingerlanerini normu 55-imut kinguariarpoq. Fraser Institutip nunanik aatsitassarsiorfissatut pilerigineqartunik ukiumoortumik misissuinerata tamanna paasinarsisippaa. Nunani misissuiffigineqartuni tunngavigineqarlutik aatsitassaqassutsikkut ilippanaateqarneq aamma inuiaqatigiinnik ingerlatsinermut tunngasut, soorlu inatsisinut tunngasut, akileraarusersueriaaseq aamma attaveqaqatigiinnikkut atortulersuutit.
Siornatigut Naalakkersuisuni siulittaasuusimasoq, Kuupik Kleist, Nunatsinni aatsitassarsiortitseqatigiinnut ukiuni arlaqartuni siunnersuisartuuvoq, taassuma Nunatta tusaamaneqarnera ernumanartoqartippaa.
– Aatsitassarsiortitsinermut unammillersinnaassagaanni pissutsit arlalinnut tunngasut atuuttariaqarput. Arlalippassuarnut tunngasuni Nunarput kinguariarsimaqaaq. Tamanna qanorluunniit nassuiarneqaraluarpat, kinguariarneq maluginianngitsuugassaanngilaq, Kuupik Kleist oqarpoq, tikkuarlugulu qinnuteqaatinik allaffissornikkut suliarinnittarneq nunap unammillersinnaaneranut isummernermut pingaarutilimmik inissisimasartut.
– Allaffissornikkut suliarinnittarneq pingaarutilimmik inissisimavoq. Aappaattut pineqartoq tassaavoq naalakkersuinikkut aalajaatsumik ingerlatsineq, naalakkersuinikkut ingerlatsinermi ulluni kingullerni aaqqiagiinnginnerit tamatumunnga atatillugu qiviarneqaannarsinnaapput.
- Aatsitassarsiortitseqatigiinni qularnanngitsumik piffissamut ungasinnerusumut pissutsinik isiginnittoqarnerusarpoq, aningaasaliisartunulli pineqartoq tassaalluni aningaasaliissutigisamik utertissinnaanissaannut naammaginartumik periarssaqarnerata nalililersortuarnissaa, Kuupik Kleist oqarpoq.
Taanna oqarpoq, Nunatsinni qularnartoqarnera aningaasaliisartunut pilerilersitsinngitsoq.
- Tamatuma saniatigut aamma pineqarput akileraarusersueriaaseq aamma akitsuutit royaltymut tunngasut, atugassarititaasunik piffissap sivikitsup ingerlanerani allanngortitsinertut isigineqartut. Tamanna aningaasaliisartunut eqquivoq, Kuupik Kleist oqarpoq, taassuma aatsitassarsiortitseqatigiinnut siunnersuisartutut aamma Nunatsinni innuttaasutut, aningaasaliisartut pilerilersinneqarsinnaanerat ernumanartoqartippaa.
Allaaserisaq tamakkerlugu Sermitsiaq aviisimi immikkut sammisami 'Future Greenland' atuarsinnaavat. Aviisi uani pisiariuk: