Unammilleqatigiinneq qalerallit akiisa qaffannerannik kinguneqarpoq

Polar Seafood A/S-ip siorna novembarimi Upernavimmi aalisakkerivimmik ammaanerata kingorna, qaleralinnik tunisineq qalerallillu akii aatsaat taama pitsaatigilersut, Upernavimmi aalisartut piniartullu peqatigiiffiat naliliivoq

Siorna novembarip qiteqqunnerani Polar Seafood A/S Upernavimmi aalisakkerivimmik nutaamik ammaammalli aalisarnikkut tunitsiveqarnikkullu pissutsit pitsaanerulersimasut, Upernavimmi aalisartut piniartullu peqatigiiffiat naliliivoq.

Sermitsiaq allappoq.

Maannakkut Upernavimmi Royal Greenlandip aalisakkeriviani qaleralik kiilumut 20 koruuneqarpoq, Polar Seafoodillu aalisakkeriviani kiilumut 22 koruuneqarluni. Polar Seafoodillu aalisakkerivittaavani, maannakkut 20-t missaannik sulisoqartumi, siorna ukiup naanissaata tungaanut qalerallit 212 tonsit tunineqarsimapput, taakkulu naatsorsuutigisamit amerlanerusut, aalisakkeriviup pisortaa Knud Mathiassen oqarpoq.

Aalisakkerivik ukioq kaajallallugu tunitsiviussaaq, unammilleqatigiinnerlu maannakkumut annertunerusumik malugineqanngitsoq, qalerallillu akii maannakkut atuuttut siunissami nikisinneqassanngitsut, aalisakkeriviup pisortaata oqaatigaa.

Aalisakkeriviup sanaartorneqarnerata nalaani Polar Seafood umiarsuarnik tunitsivinnik marlunnik Upernaviup eqqaaniititaqaroq.

Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq:

Powered by Labrador CMS