Unammersuarnerit maannamut unitsinneqarput
Qaannamik unammersuarneq Nuummi ingerlanneqartoq unitsinneqarpoq. Nuummi angutit isikkamik arsaallutik Nunatsinni unammersuarnissaanut anngunniunnerat Kalaallit Arsaattartut Kattuffianiit (KAK-imiit) kinguartinneqarpoq. Maniitsumilu nukappiaqqat U15-imi isikkamik arsaattartut unammersuarnissaat KAK-p maanna qulakkeerniarsaraa.
Qaannamik unammersuarneq ingerlaannaq unitsinneqarpoq. Unammersuarneq tallimanngornermi juulip qulingiluaanni aallartippoq arfininngorpallu aatsaat naammassisussaagaluarluni. Maannalu marlunngornermi unammersuarneq naammassineqarpoq, naammassineqarneranilu akissarsititsinerit ingerlanneqaleruttorlutik.
Qaannamik unammersuarneq kisiat katerinnissamut maleruaqqusaalersunut kisiat eqqugaanngillat.
- Arsaattarfimmi arsaattussat ikilinerasigut unammersuarnerit ingerlatiinnarnissaat qulakkeerniarsaraarput. Tamanna allaffeqarfitta paasinialeruttorpaa. Nukappiaqqat U15-imi unammisartut taamaallaat arsaattarfimmi arfineq pingasuusarput. KAK-ilu arsaattartut arfineq-marlunngortinnissaat sulissutigaa. Taamaalilluni arsaattarfiup iluani silataannilu 20-t peqataasinnaanngortillugit, KAK-imi siulittaasoq, Finn Meinel Sermitsiaq.AG-imut oqarpoq.
Tamanut isersimaffigineqartartuni inuit 20-it nalunaaqutaq 16.00-imiit atuutsinneqalerpoq. Maleruaqqusarlu tallimanngorneq juulip 16-ata tungaanut atuutsissalluni.
Anngunniunnerit kinguartinneqarput
Angutit isikkamik arsaallutik unammersuarnissaanut anngunniunnerit Nuummi ingerlanneqartut tamaasa unitsinneqarallarput.
- Nuummi anngunniunnerit unitsinneqarallarput. Maannamut unamminerit naammassisinnaanngilagut. Qaqugu tungaanut kinguartinneqarnersut aamma maannamut oqaatigisinnaanngilarput, Finn Meinel oqarpoq.
Uummannami angutit isikkamik arsaallutik aamma unammiuaarput. Taavanilu unamminerit KAK-p ataani aaqqissuusaanngimmat akuleruffigisinnaanagu Finn Meinel-ip oqaatigaa. Taamaakkaluartorli maleruaqqusat malinneqarnissaat kaammattuutigalugu,
- Uummannami unamminerit KAK-p aaqqissuusarinngilaa. Taamaattumik sinnerlugit aalajangiisinnaanngilagut, kisiannili inatsisit malinneqarnissaat kaammattuutigaarput, Finn Meinel oqarpoq.
Tamanut isersimaffiusinnaasut silataanilu 20-t ataatsimoorsinnaapput, angutillu isikkamik arsaakaangamik arsaattarfimmi katillutik 22-iusarput. Taassuma saniatigut dommerit taartissallu unamminermi piareersimasarlutik.