Inuili
Umimmaat savaaqqallu neqaat amigaatigineqartut
Inuilimi ilinniartut piginnaasatik takutikkusuppaat, ilinniarfilli neqinik Danmarkimeersunik atuisariaqarpoq
Pisarnertut Narsami inuussutissalerinermik ilinniarfik Inuili upernaakkut niuffatsitsivoq, tassani ilinniartut nerisassalerinermik piginnaasaminnik takutitsillutik.
Neqaaerniat nerisassiaannik syltimik, tinguaqqamik pølsinillu tunisassioraluarlutik amigaateqarput: Tunisassiassat nunatsinneersut.
Neqit Danmarkimeersut
Ilinniarfik paasissutissiivoq savaaqqat neqaannik umimmaallu neqaannik nunatsinneersunik naammattumik pitsaassusilinnik pissarsisinnaasimanatik. Taamaattumik neqit Danmarkimeersut atorsimavaat.
Tunisassianilli nunatsinneersunik pisiassaqarpoq, eqalunnik kapisilinnillu pujuukkanik.
Tamatuma saniatigut kaageqarpoq kinguleqqiuteqarlunilu kuannernik rabarbarinillu.
Ullo´qeqqasiutit
Ilinniarfiup kantiinaani pulaartut sandwichitorlutillu kaagisorsinnaapput. Silamilu neqit grill-ikkat pasta-llit salatillillu tuniniarneqarput, amerlasuullu tamakkua ullo´qeqqasiutigaat.
Pisiniarfimmi tuniniaaneq
Upernaakkut, ukiakkut imaluunniit juulli sioqqullugu pisiniarfimmi tuniniaanermi ilinniartut akinik naatsorsuinermik, nioqqutissanik tuniniaanermik pisisartunillu kiffartuussinermik ilinniartarput, siunissami suliffimminni iluaqutigisinnaasaminnik.