Umimmaat pillugit suliaq: Takunnissimasinnaasunik politiit suli ujaasipput.
Kalaallit Nunaata Politiivi Upernaviup eqqaani sumiiffinni marlunni umimmannik toqutseriarlutik qimagaaginnarsimasunik ilisimannittuusinnaasunik suli ujaasipput. Suliami inuk ataaseq, sumiiffimmi allami inatsimmik unioqqutitsilluni umimmanniarsimasutut unnerluunneqarsimavoq.
Upernaviup kujataani Millorfimmi aamma Amitsumi umimmannik toqutanik qimatsiinnarsimasut pillugit ilisimannittuusinnaasunik, Kalaallit Nunaata Politiivi suli ujaasipput. Suliaq 10. august politiinut nalunaarutigineqarsimavoq.
Umimmaat 30-t missaanniittut toqunneqarsimapput, neqaali tiguneqarsimanatik.
Ilisimannittunik ujaasisut
Kalaallit Nunaata Politiivi tusagassiorfinnut nalunaaruteqarlutik ilisimatitsipput suliami paasiniaasoqarnerani innuttaasunit ikiorneqarnissaminnik suli pisariaqartitsillutik.
Taamaammat Upernaviup kujataani Millorfiup aamma Amitsup eqqaani inunnik 10. august missaani angalaartunik takunnissimasinnaasut politiinut 701448-mut saaffiginneqquneqarput.
- Paasiniaanermi umimmaat toqungasut arlallit nassaarineqarsimapput, umimmaalli toqunneqariarlutik qimatat 30-t pillugit uppernarsaatit saaffiginninnerillu suli naammanngillat, politiit allapput.
Inuk ataaseq unnerluunneqartoq
Suliamik nalunaaruteqaqqaartoqarneraniilli uppernarsaatit naammassimanngimmata, politiit takunnissimasinnaasunik ujartuisimapput. Tamassuma kinguneranik suliami inuk ataaseq unnerluunneqarpoq. Taanna Upernaviup kujataani sumiiffimmi allami, inatsimmik unioqqutitsilluni umimmanniarsimasutut unnerluunneqarpoq.
- Paasiniaanerup massuma ingerlanerani Kalaallit Nunaata Politiivi inummik ataatsimik 17. august unnerluussisinnaalerput. Inuk Arfertuarsummi, Upernaviup kujataani umimmannik arfinilinnik inatsimmik unioqqutitsilluni piniarsimavoq.