Umimmaat meqqui nuannarineqarluartut

- Umimmaat qiviui soqutiginneqarluinnartuupput. Atuisut amerlangaarmata arfininngornerup ullakkuani tuniaavimmi peqataasinnaasimanngilagut, Anita Høegh Qiviut-imeersoq sapaatip akunnerata naanera Saltumimi Qiviunik festivalertitsisoqarnerani oqaluttuarpoq.

- Ukioq kingulleq Tysklandimi tunisassiat tigoqqammerpagut, sapaatip akunnerata tulliani Kalaallit Nunaanni pisiniarfiutigut immeriartunnginnerini Saltumimi Qiviunik festivalertitsinermut alakkassalluta aalajangersimavugut, Anita Høegh oqarpoq.

Qilattaasartut nuannaartut

- Saltumimi ullualunni atuisunik arlalinnik nuannaartunik naapitsinni pissaganarlunilu ulapaarfiusimavoq. Festivalimi atuisut arlallit oqaloqatigaagut. Arlallit feriarlutik suliffimulluunniit atatillugu Kalaallit Nunaanniissimapput umimmaallu qiviunik annertuumik ilisimasaqarlutik. Soorunalimi aamma qulartoqarpoq umimmannik Kalaallit Nunaannillu paasisaqarnerorusuttunik, taamaalilluta Kalaallit Nunaannut aallartitaavugut, Anita Høegh isumaqarpoq.

Umimmaat qiviui pilerineqarluartuupput. Siullertut oqorsaatitsialaammat kisianni aammaa piujuaannartitsinermik tunngaveqartumik piniarneqarlutillu tunisassiarineqartarmata. Umimmammit ataatsimi qiviut kilo ataaseq sananeqarsinnaavoq. Tunisassiornerlu aamma piffissangaatsiami pisarpoq. Ukiullu tullissaanut tunisassiassat Anita Høeghip nassiuteqqammerpai.

Qiviut

Piumaneqanera pissutigalugu Qiviut anngummanniapiloorpoq:

- Piffissami sivikitsumi piartarnerup ikittuinnarnillu pisaqartarnerit pissutigalugit qiviut amigaatigaagut. Piujuaannartitsinermik tunngavilimmik umimmanniartoqartalersinnaanera qularutiginngilarput. Tamanna atuisutta uagullumi aamma kissaatigaarput, Anita Høegh, apeqqut pillugu maannakkut Aalisarnermut, Piniarnermut Nunalerinermullu Naalakkersuisoqarfimmik oqaloqateqartoq, oqarpoq.

Qiviut 2008-imi pilersinneqarpoq, taamani Anita Høegh ukiuni arlalinni Kangerlussuarmi takornarialerinermi pisortaareerluni Sisimiunut nuunnerata kingorna pivoq. Suliffeqarfik Sisimiuni Nuummilu pisiniarfiuteqarpoq internettikkulli Qallunaat Nunaanni, Norgemi, Sverigemi, USA-mi aamma Canadami aamma tunisisoqartarpoq. Piniartut toqqaannartumik Qiviut-mut tunisisarput.

Saltumimi qiviunik festivalertitsineq nunarsuarmi annersaraat. Sapaatip akunnerata naanerani tupersuarni assigiinngitsut 60-it saqqummersitsipput. Sapaatip akunnerani festivalimi inuit 15.000 aamma 20.000 akornanni orninneqarsimavoq, Gitta Hansen Saltum Uldfestivalimi siulittaasoq oqarpoq.