Umiatsiarluni ajutoorneq: Angummik inuusuttumik ujaasineq taamaatinneqarpoq

Nunaqarfiup Kuummiup eqqaani umiatsiamik ajutoortoqareersoq angut 19-nik ukiullip ajunaarsimanissaa politiinit ilimagineqarpoq. Angut ilaaqataasoq imigassartorsimalluni umiatsiarsimasutut aamma mianersuaalliorluni toqutsisimasutut unnerluutigineqarpoq

Nunaqarfiup Kuummiup eqqaani umiatsiarluni ajutoortoqarsimaneranik politiit nalunaarfigineqarput ippassaq arfininngorneq nalunaaqutaq 17.30.

Inuusuttut pingasut, angutit marluk arnarlu, Kuummiunit umiatsiamik avalassimapput. Angutit marluk ilaasut ajutoortoqarnera pissutaalluni imaanut pisimasut politiit tusagassiutinut nalunaarummi ilisimatitsissutigaat.

Ajunaarsimanissaa ilimagineqarpoq

- Angut imaaneereernermi kingorna umiatsiamut qaqeqqissinnaasimavoq, angutip aappaa politiinit innuttaasuniillu ujaarineqarluni.

Angut 19-nik ukiulik Kuummiuneersoq ujaarineqartuuvoq. Angutip ajunaarsimanissaa politiinit ilimagineqarpoq.

- Angutimik ujaasineq taamaatinneqarpoq, ilaqutaasut ilisimatinneqareerput, politiit nalunaarput.

Mianersuaalliorsimasutut unnerluunneqartoq

Angut umiatsiamut nammineerluni qaqeqqittoq politiinit maanna imigassartorsimalluni umiatsiarsimasutut aamma mianersuaalliorluni toqutsisimasutut unnerluutigineqarpoq.

Suliaq politiinit suli misissuiffigineqarpoq.

Powered by Labrador CMS