Umiatsiaq marlunnik ilaasulik politiinit ujaarineqarpoq
Umiatsiaq marlunnik ilaasulik, Itillimiit Kangaamiut tungaanut pingasunngornermi aallartoq, tammaaneqartoq politiinit maanna ujaarineqarpoq. Umiatsiartut Kangaamiunut tikinngitsoorsimapput.
Umiatsiaq marlunnik ilaasoqartoq Itilliup Kangaamiullu akornanni tammaaneqartoq, Kalaallit Nunaata Politiivisa, Arktisk Kommando Air Greenlandilu suleqatigalugit tallimanngornermi ujaaraat. Ujaasineq sisamanngornermi aallartinneqarsimavoq.
Umiatsiaq Itillimit pingasunngorneq 11. maj nal. 23.50 missaani kujammut Kangaamiut tungaanut aallarpoq. Ilaasuupput angut 40-nik ukiulik arnarlu 37-nik ukiulik.
Umiatsiaq Kangaamiunut tikinngitsoorsimavoq, angalasullu ilaqutaasunut tutsiutinngimmata, umiatsiaq ilaasuilu tammaaneqartutut, politiinut sisamanngornermi ullaakkut nalunaarutigineqarput.
Kalaallit Nunaata Politiivisa nalunaarut sisamanngornermi nal. 10.00 missaani tiguaat.
- Umiatsiaq qaqortuuvoq 17 fod-iulluni, naqqatigut qernertumik qalipaateqarpoq, qaleqarlunilu. Umiatsiaq aquuteralaqarpoq 100 HK Suzukimeersumik, politiit nassuiaapput.
Umiarsuarmik qulimiguulimmillu ujaasisoqarpoq
Kalaallit Nunaata Politiivi Arktisk Kommandomit ujaasinermi ikiorneqarput. Angallat nakkutilliiartortitaq Ejnar Mikkelsen sinerissap avataani ujaasisimavoq. Air Greenlandillu qulimiguulia Itilliup Kangaamiullu akornanni ippassaq aamma ujaasisimalluni.
Politiit angallataat Ilik Itilliup Kangaamiullu akornanni sinerissap qanittuani ippassaq ujaasisimavoq.
Ujaaseqatigiittut tamarmik ullumi ujaasinertik nangikkaat, politiit ilisimatitsissutigaat.
- Umiatsiamik ujaasineq ullumi nanginneqarpoq, Itillimiit umiatsiat marluk maanna ujaaseqataapput, politiit ilisimatitsipput.