Umiatsiaarsinermut suliaq: Siumut tusagassiuutit pillugit aalajangiisartunut maalaarpoq
Aviisip Sermitsiap allaaserisai pillugit Partii Siumut tusagassiuutit pillugit aalajangiisartunut maalaaruteqarpoq
Siumut tunuliaqutaralugu politikerit Karl Kristian Kruse, Henrik Fleischer Nikkulaat Jeremiassenilu pisortat aningaasaataannik atornerluisutut 'eqqunngitsumik nivinngagaallutik misigisimapput'. Allaaserineqartut aviisimit Sermitsiamit sapaatip akunnerani 37-mi saqqummiunneqarput.
Allaaserineqartut tunngavigalugit Siumut tusagassiuutit pillugit aalajangiisartunut maalaarpoq.
Sermitsiap saqqaani sapaatip akunnerani 37-imi saqqummersitaminik allappaa:
”Paasisaasut: Akileraartartut aningaasaataannik umiatsiaararsisut”. Tassani allaaserisami nassuiarneqarpoq umiatsiaararsinerminnut atatillugu aalisarnerup aningaasalerneqarnissaanut aningaasaliissutinit aningaasanut inatsimmiittunit katillugit 800.000 koruunit tungaannut tapiiffigineqarlutillu aningaasaliiffigineqarsimasut.
Eqqunngitsumik nivinngagaasorisut
Allaaserineqartoq illuinnaasiorluni eqqunngitsumik pasilliinernik mamarliinernillu imaqartillugu allataasoq Karl Kristian Kruse isumaqarpoq.
- Pisortat aningaasaataannik atornerluisimasutut eqqunngitsumik nivinngagaalluta misigisimavugut, uffalu aalisarnermik aningaasatigut tapiissuteqartarnermit inatsimmi pisinnaatitaaffigigipput tapiiffigineqarsinnaalluta. Tusagassiorfiup avataaniit ikiortilerluni mamarliinera pasinarsaarineralu akuerisinnaanngilara, tusagassiutinut nalunaarummi oqarpoq.
Pasinarsaasoqartoq
Allaaserineqartuni aamma qinikkat pineqartut immikkut pineqarsimasutut isikkoqalersillugit pasitsassaarisoqartoq partii Siumut naliliivoq.
- Tusagassiorfiup Sermitsiap tikkuartunngitsuugaa tassaavoq allaffissornikkut aalajangersakkat sumininnguamilluunniit politikkikkut akuleruffigineqarsinnaanngimmata, allaaserisami tapiissuteqartarnermut tunngasutigut taaneqartumi, partii allappoq.
Aviisimi Sermitsiami aaqqissuisoq Poul Krarup tusagassiuutit pillugit aalajangiisartunut maalaarut ima oqaaseqarfigaa:
- Sermitsiami allaaserineqartut Siumumi ilaasortanit naammagineqannginneranut atatillugu tusagassiuutit pillugit aalajangiisartunut maalaaruteqarnerat ajunngilaq. Tamanna pissutaalluni Tusagassiuinermut tunngasuni aalajangiisartoqarpoq. Politikerit eqqunngitsuliorfigineqarsimasutut misigisimanerat utoqqatsissutigaarput. Taamaattoq tusagassiornermi ileqqoreqqusat tamaasa malinneqarnissaat anguniartuarparput.