Umiatsiaararsortut: KNAPK aporaaffiusoq

KNAPK-p aalisartut avissaartuunnissaat ernummatigigaa, kattuffiup allap SQAPK-p ilaasortaqarnerulernissaniperiarfissaqarsoraa

Ukiut kingullit arfinillit iluanni Kalaallit Nunaanni Aalisartut Piniartullu Kattuffiata, KNAPK-ip, umiatsiaararsortut tamakkiisumik ataatsimoortissinnaasimanngilai. Sermitsiaq aviisi taama allappoq.

2013-imi Ilulissani, Qeqertami Saqqamilu sinerissap qanittuani aalisartut KNAPK-mut ilaasortaajunnaarlutik namminneerlutik Sinerissap Qanittuani Aalisartut Piniartullu Kattuffiat, SQAPK, pilersippaat. Kattuffik maanna 200-t missaannik ilaasortaqarpoq.

Maannalu Sisimiuni aalisartut piniartullu peqatigiiffianni, SAPP-mi siulersuisuni ilaasortat ilaasa, KNAPK-miit aninissartik ilimasaarutigaat, peqatigiiffiillu allat taamatut iliuuseqarnissaannut kaammattorlugit. Taamaaliornikkut kattuffimmik nutaamik, sinerissap qanittuani aalisartunik sullissisussamik pilersitsinissaq siunertarineqarpoq. Taamaalilluni sinerissap qanittuani aalisartut KNAPK-llu akornanni avissaartuunneq maanna suli angineruleqqippoq

Siulittaasoq sanngiitsoq

KNAPK-p siulittaasuata Henrik Sandgreenip umiatsiaararsortut atugaat maannakkornit pitsaanerulersissinnaasimanngikkai, SAPP-mi siulersuisuni ilaasortaq, Marius Nielsen-Isaksen isumaqarpoq. Aalisakkat, soorlu saarulliit akiisa, appasippallaarnerat, politikkikkullu aalisarneq pillugu oqallinnermi sunniuteqanngippallaarneq, uani naammagittaalliuutigineqartunut ilaapput. Aammali aalisakkat qaqinneqartartut, soorlu saarulliit niaqui, aamma nipisaat, tunitsivissaqartinneqaratik igiinnarneqartarnerat KNAPK-p iliuuseqarfigisimanngikkaa, Marius Nielsen-Isaksen isumaqarpoq.

KNAPK-p naammagisimaarneqannginnera pillugu allaaserisaq Sermitsiaq aviisimi atuaruk. Aviisi uani pisiassaavoq:

Powered by Labrador CMS