Umiatsiaararsortut unnuap taarnerani imaani ajornartorsiorsimasut
Umiatsiaaqqani marlunni inuit pingasut unnuaq pingasunut Ilulissat avataanni ni sømilisut ungasitsigisumiillutik sikunit mattussaagamik ikiortissarsiortariaqarsimapput. Ajoquteqanngitsumut nunamut anngunneqarsimapput.
Issittumi Sakkutooqarfik umiatsiaaqqat marluk pingasunik inuttallit Ilulissat avataani sikumit nikeriaqqissinnaajunnaarsimasut pillugit unnuaq nalunaarfigineqarami aalajangersimavoq, umiarsuaq alapernaarsuut Ejnar Mikkelsen sumiiffimmukartinneqassasoq.
Umiatsiaaqqap aappaani aquut ajoqusersimavoq, aamma ajornartorsiortut arlaannaalluunniit annanniutaasinnaasunik nassataqarsimanngillat, taamaammallu pisoq ilungersunartuusimalluni.
Najukkami umiatsiaatilik ikiuukkiartorsimasoq
Ejnar Mikkelsen ajornartorsiortunut suli apuutinngitsoq, Ilulissani umiatsiaatilik ajornartorsiortunut ikiuukkiartorluni apuussimavoq, umiatsiaaqqallu marluutillugit inuttaalu ajungitsut umiarsualivimmut anngussimavai, Issittumi Sakkutooqarfik Sermitsiaq.AG-mut ilisimatitsivoq.
- Ullaaq arfineq-marlup eqqaani nunamut anngunneqarput, pissutsillu eqqarsaatigalugit tamarmik ajunngillat, Issittumi Sakkutooqarfik ilisimatitsivoq.