Umiatsiaararsortunut itigartitsissutit amerlassusaat ilisimaneqanngillat

Aalisarnermut naalakkersuisoqarfiup allaffissornikkut ingerlatsineranik misissuinermut atatillugu avataasiorluni sinerissallu qanittuani aalisarneq Deloittemit misissorneqarpoq, tamanna Kukkunersiuinermut Ataatsimiititaliamit “sakkortuumik isornartorsiugassatut” nalilerneqarpoq.

2020-mi sinerissap qanittuani aalisarnermut akuersissutinik nutaanik qinnuteqarnernut aamma akuersissutinik nutaanik agguaanerit amerlassusaannut tunngatillugu, aalisarnermut naalakkersuisoqarfik nalunaarsuisimanngitsoq paasinarsivoq. Amerlassusaat ilisimatitsissutigineqarsinnaanngilaq, taamaallaat aggustip 24-anni 2020-mi angallatinut umiatsiaaqqanullu sinerissap qanittuani aalisarnermi akuersissutinik tunniussisoqarsimasoq ilisimatitsissutigineqarsinnaavoq.

Akuersissutinik allaffissornikkut suliaqarnerup qanoq ingerlanneqartarneranik, Deloittep qulaajaanissaanik tamatuma ajornakusoortilersippaa.

Itigartitsinerit allattorneqanngitsut
- Naalakkersuisoqarfimmit qinnuteqartut qinnuteqaataat itigartitsissutigineqarsimasut pillugit nalunaarsuiffimmik pissarsisoqarsinnaasimanngilaq. Taamaattumik sulianik qinnuteqaammik itigartitsiffiusunik nakkutilliinermik ingerlatsisoqarsinnaasimanngilaq, kukkunersiuilluni misissuinermi Kukkunersiuinermut Ataatsimiititaliap suliarititaani tamanna ilisimatitsissutigineqarpoq.

Deloittep qinnuteqaatit assigiinngitsut sisamat misissorpai, naalakkersuisoqarfillu ukioq naallugu akuersissutinik agguaasimasoq paasinarsivoq, naak akuersissummik qinnuteqarnissaq novembarip 30-annut killeqartoq atuarneqarsinnaagaluartoq.

Qinnuteqartunit sisamaasunit pingasut, angallatip akuersissutaanik nutaamik qinnuteqarsimasut, inuiaassusermut aamma uuttuinermut uppernarsaatit piumasaqaataasut qinnuteqaatiminnut ilanngussimanngilaat.

- Naalakkersuisoqarfik ilisimatitsivoq, qinnuteqartup aalisarnermik ingerlatsisuunera pissutigalugu qinnuteqartut uppernarsaatit amigaataasut piumaneqanngitsut nassuiaatigineqarpoq.

Uuttuinermut inuiaassusermullu uppernarsaatit
Naalakkersuisoqarfiup qinnuteqartunut ilisimasat tunngavigalugit, naalakkersuisoqarfiup uuttuinermut inuiaassutsimullu uppernarsaatit nassiunneqarnissaannut piumasaqaateqarsimannginnera paasinarsinnaasoq, Deloitte allappoq.

- Taamaakkaluartoq naalakkersuisoqarfimmit ullumikkut piumasaqaatigineqarpoq uppernarsaatit nassiunneqassasut, Deloitte tikkuartuivoq, ilanngullugu una oqaatigineqarpoq:

- Naalakkersuisoqarfimmit ukiut tamaasa angallatit nakkutilliiffigineqarnissaat naapertuutinngitsutut isigineqarpat, naliliisoqartariaqarpoq qanoq akulikitsigisumik nakkutilliinernik ingerlatsisoqartassanersoq. Taamaaliornikkut qulakkeerneqassaaq, naalakkersuisoqarfiup ingerlatsinera ingerlatsinermut tunngavissallu taamaaqatigiinnerat.

Suliami ataatsimi naalakkersuisoqarfiup qinnuteqaat kommunimit maili tunngavigalugu suliaraa, tamannalu qinnuteqaatip qinnuteqartumit immersorneqarlunilu atsiorneqarnissaanik piumasaqaammut naapertuutinngilaq.

Kommunip nakkutilliineranut qularneq

Qinnuteqartup allap uuttuinermut inuiaassutsimullu uppernarsaatit umiatsiaararsornermut akuersissummut atatillugu nassiussimanngilai.

- Qinnuteqartoq siornatigut sulisitsisuminit aamma najukkami aalisartut piniartullu peqatigiiffiannit oqaaseqaatinik nassiussisimavoq, aalisarnermik inuussutissarsiuummik ilisimasaqarnermut uppernarsaatitut, tamanna atuarneqarsinnaavoq.

Qinnuteqaatip eqqortumik immersorneqarsimanersut aamma uppernarsaatit pisariaqartinneqartut ilanngunneqarsimanersut, kommunip najugaqarfiusup nakkutigisussaavaa.

Kisianni kommunip naalakkersuisoqarfimmut ingerlatitseqqinnerani, “naakkutilliiffigineqarsimanersoq qinnuteqartumut najugaqarnissamut- aamma akileraartarnermut piumasaqaatinik naammassinnissinnaasimanera”, takuneqarsinnaanngitsoq Deloitte allappoq.

Imaqarnersiorneq
Sinerissap qanittuani aalisarnerup allaffissornikkut ingerlanneqarnerani imaqarnersiornermi, Deloittep ilaatigut una inerniliuppaa:

Qinnuteqaatinit sisamaasunit pingasut ingerlatsinermut periuseq atuuttoq malillugu suliarineqarput.

Angallatit takissusaat 6 meteriunersut imaluunniit takinerunersut, aamma angallatip piginnaassusaa 75 BRT/120 BT-ip ataanneraa, naalakkersuisoqarfiup nakkutiginngilaa. Taamaalilluni qinnuteqartup angallataasa takissutsimut piginnaassutsimullu piumasaqaatit naammassineraat, naalakkersuisoqarfiup nakkutiginngilai.

Qinnuteqaatinit sisamaasunit ataaseq suliarineqartussaanngikkaluarpoq. Taarsiullugu naalakkersuisoqarfiup kommuni qinnuteqartumut attaveqarnissaanik qinnuigisussaagaluarpaa, qinnuteqarnermullu immersugaq piumallugu.

Aammattaaq sullissinermut atatillugu sulianut allattuinernik sullissinermulluunniit tunngasumik allattuinermik uppernarsaasiortoqarneq ajorpoq, tamannalu Deloittep aalajangersimasumik periusinngornissaa innersuussutigaa. Taamatullu aamma naalakkersuisoqarfik sooq pissarsisoqarsimaneranik imaluunniit itigartitsisoqarsimaneranik tunngavilersuummik kommuninut tunniussisassasoq, taamaalilluni kommuni qinnuteqartunut akissummik nassiussisinnaassammat.

Aalisarnermut naalakkersuisoqarfiup oktobarimi allataani aamma tusagassiuutinut nalunaarummi arfinngormat nassiunneqartumi ilisimatitsissutigineqarpoq, naalakkersuisoqarfiup ingerlatsinini iluarsaatileruttoraa, aamma arlalitsigullu Deloittep ingerlatsinermut misissuineranut atatillugu innersuussutai malinneqareertut.