Umiatsiaararsortoq takornarialerinermik inuussutissarsiuteqalissaaq
Ukiut kingulliit Kujataani umiatsiaararsortunut atungassarititaasunut ilungersunartunut naleqqussarnissaq pisariaqartoq, aalisartoq piniartorlu 64-inik ukiulik Ole Larsen, Campus Kujallermi Arktisk Adventure Guidetut ilinniakkaminik naammassinnilersoq isumaqarpoq.
Naak Qaqortup Arsuullu eqqaani sinerissap qanittuani saarulliit tammakaasavissimagaluartut, Kujataani sumiiffinni allani julimiik januarip tungaanut avataata saarullinik angisuunik aalisagarpassuaqarpoq.
Aviisi Sermitsiaq taama allappoq.
Ukiulli kingulliit ingerlaneranni coronap nunarsuarmi niuernermut eqquinerlorujussuarnera, Kalaallit Nunaani saarullinnik tunisinermi akigitinneqartartup appariarujussuarneranik kinguneqarpoq. Maannakkummi Kujataani aalisakkanut suliffissuarnut saarullik kilomut 4,50 kronilerlugu tunineqartarpoq, tamannalu pissutingalugu sinerissap qanittuani saarullinniarneq imminut akilersinnaajunnaarsimasoq umiatsiaararsortut isumaqarput.
Kujataani sinerissap qanittuani aalisarnermi angallatit anginerusut amerlanngitsuinnaat atorneqarput, amerlanerpaallu umiatsiaararsortuullutik. Tamannalu pissutaalluni sinerissap qanittuani imminut akilersinnaasumik annertuumillu saarullinniarneq ingerlanneqarani.
Kujataanilu sinerissap qanittuani aalisarnikkut pissutsit taamaatsillugit aalisarnermik inuussutissarsiuteqarnerup ineriartortinneqarnissaa killilersimaarneqarpoq.
- Aalisakkat akiisa appasippallaarnerujussuat pissutaalluni umiatsiaararsortut amerlanerpaartaat anginerusunik angallatitaarnissaminnut akissaqanngillat, Nanortalimmi aalisartoq piniartorlu Ole Larsen oqarpoq.
Umiatsiaararsortunullu atugassarititaasut ilungersunarsiartuinnarneri pissutingalugu, taanna aasaq manna Qaqortumi Campus Kujallermi Arktisk Adventure Guidetut ilinniarluni aallartippoq decemberillu qiteqqunnerani naammassissalluni.
Aviisimi Sermitsiami atuarnerusinnaavutit: