Umiatsiaararsorluni qaleralinniarneq ajalusoorluinnalertoq
Umiatsiaararsorluni inuussutissarsiuteqarneq Naalakkersuisut innarlerujussuaraat, Ilulissani umiatsiaararsortut peqatigiiffiat isumaqarpoq.
Qeqertarsuup Tunuani umiatsiaararsorluni qaleralinnianermut pisassiissutit martsimoortut 214 tonsit nungunneqarmata, Kalaallit Nunaanni Aalisarsinnaanermut Nakkutilliisoqarfiup, KANUAANA-p, Namminersorlutik Oqartussat ataani Aalisarnermut Piniarermut Nunalerinermullu Pisortaqarfiup ataani inissisimasup, aalisarneq 7. marts matuaa.
Aviisi Sermitsiaq taama allappoq.
Februarimut pisassiissutit 214 tonsiusut 100 tonsit missaannik sipporlugit pisarineqarsimanerat, matusinermut pissutaavoq.
Aalisarnermut nalunaarutip siorna decembarimi Naalakkersuisunit allanngortinneqarneratigut, angallatinut pisassiissut atunngitsuukkat ukiup naalernerani umitsiaaqqanut qaleralittassatut pisassiissutissatut nuunneqarsinnaalerput. Ukiut siuliini angallatinut qaleralittassiissutit nungunneqarneq ajorput, ukiorlu manna taamaattoqaqqinnissaa naatsorsuutigineqarsinnaammat, oktoberimi, novemberimi decemberimilu umiatsiaaqqanut qaammatikkaarlugu pisassiissutiniit katillugit 225 tonsit, marts-imut nuunneqarput. Naallu aalisarneq aprilip aallaqqaataani aatsaat aallarteqqinneqartussatut KANUAANA-p nalunaartutigereeraluaraa, pisassanik nuussisoqarneratigut aalisarnerup 13. marts aallarteqqinneqarsinnaanera taamaalilluni qulakkeerneqarpoq. Pisassiissutigineqartulli ullut ikittuinnaat ingerlanerini tamakkerneqaqqimmata, aalisarneq 23. marts matuneqaqqippoq, aatsaallu aprilip aallaqqaani ammarneqaqqissalluni.
Pisassiissutit ikinnerusut
Aqutsiveqarfik Qeqertarsuup Tunuani sinerissap qanittuanut qaleralinnut pisassiissutissatut 7.847 tonsit, taakkunannga 3.667 tonsit umiatsiaararsortunut, pisaassiissutigineqassasut siorna decemberimi Naalakkersuisut aaliangerpaat. Aqutsiveqarfik Uummannamut angallatinut umiatsiaaqqanullu 9.167 tonsit, aqutsiveqarfik Upernavimmullu 8.134 tonsit aamma pisassiissutigineqarput.
Aviisimi Sermitsiami atuarnerusinnaavutit: