Umiatsiaaraq meerartalik ikkarluit ulorianartut eqqaanni tissukarsimasoq

Umitsiaaqqami isumannaallisaanermut pingaarutilinnik atortoqarallartillugu, Issittumi Sakkutooqarfiup inuit arfinillit umiatsiaaqqami ulorianartorsiortut annaassinnaasimavai.

Inuit arfinillit unnuaq umiatsiaaraa motooriiarmat tissukalersimapput. Umiatsiaaraq Ilulissat avannaata tungaani ikkarluit ulorianartut eqqaanni tissukalermat, umiarsuaq alapernaarsuut Lauge Koch annaassiartortinneqarsimavoq.

Issittumi Sakkutooqarfik facebookikkut taamatut allappoq.

Sakkutooqarfimmi aqutsisut ilisimatitsissutigaat, arfininngornerup unnuaani nal. 03:34 umiatsiaaqqami ajornartorsiortoqartoq nalunaarutigineqarsimasoq.

Umiatsiaaqqami atortorissaarut Garmin inReach aallartinneqarmat nalunaarut anngussimavoq. USA-mi centeri aqqutigalugu Issittumi Sakkutooqarfiup atortua JRCC kalerrinneqarsimavoq.

Atortorissaarut Garmin pingaaruteqarsimasoq

- Minutsialuit qaangiummata Laug Koch umiatsiaaqqami ajornartorsiortunik annaassiniariartortillugu aallartinneqarpoq. Politiit sumiiffimmik ilisimasaqarnerisigut, Lauge Kochimi inuttat sukkasuumik sulisinnaanerisigut minnerunngitsumillu annanniummik aallartitsinissamik aaalajangertoqarsimaneratigut, inuit arfinillit ajunngitsut nunamut ullaaq manna anngunneqarsinnaasimapput, Issittumi Sakkutooqarfik allappoq.

Sakkutooqarfimmi aqutsisut naapertorlugit, umiatsiaaqqami issimasunik annaassiniarnermi atortorissaarut D`Garmin iluaqutaasimavoq:

- Sukkasuumik isumannaatsumillu suliassamik isumaginnissinnaanermut umiatsiaaqqap Garmin inReachimik atortoqarnera pissutaavoq, atortoq ajunngitsumik ikkunneqarsimavoq piginnittorlu tassannga atuinissamik ilisimasaqarluarluni, Issittumi Sakkutooqarfik allappoq, tassungalu atatillugu politiit peqatigalugit imaani angalasartunut tamanut kaammattuutigaat, imaani angalanermi isumannaallisaanermut siunnersuutinik malinneqqullugit attaveqarnissamullu atortuminnik ilisimasaqaleqqullugit.

Powered by Labrador CMS