Umiatsiaaqqamik aallarussisimaneq pisariaqanngitsumik ujaasinermik nassataqarsimavoq
Marlunngormat umiatsiaaqqamik aallarussisimaneq Nuummi Qinngorput kangerluani ujaasinermik nassataqarsimavoq, arlaannik ajunaartorsimanissaa ernummatigineqarsimagami.
Politiit umiatsiaaqqamik aallarussisimasinnaasunik takunnittoqarsimanersoq paasisaqarusupput, aallarussisimaneq ajunaarsimasinnaasunik ujaasinermi asuli sulisunik atuinerusimammat.
Marlunngormat ullaakkut umiatsiaaraq Dr. Ingrdip Napparsimmavissuata avataani tissukartoq takuneqarsimavoq. Inuttaqanngilaq, politiillu annilaanngatigisimavaat inummik imaanut nilleqisumut nakkartoqarsimassanersoq.
Maqaasisaqartoqanngitsoq
Politiit angallataanik ujassineq aallartinneqarsimavoq, maannali pasitsaanneqarpoq umiatsiaaraq aallarunneqarsimassasoq, aallarussisimasullu umiatsiaaraq qimaannarsimagaat kingusinnerusukkullu imaanut tissukalersimassasoq.
- Inunnik maqaasineqartunik nalunaarfigineqarsimanngilagut, ilimagaarpullu ajunaartoqarsimanngitsoq, Nuummi politiit pigaartuisa pisortaat Julie Senderowitz oqaluttuarpoq.
Taassuma ilanngullugu oqaatigaa, umiatsiaaqqap pituutaa savimmik kipineqarsimasoq takuneqarsinnaasoq. Umiatsiaq pullattagaq Dr. Ingridip Napparsimmavissuata sissaanut qimaannarneqarsimavoq, tamatuma malitsigisaanik ilimatsaanneqarpoq, aallarussisimasut ataasinngormat silaginnerani angalaalaarusussimagunartut, umiatsiaaqqamillu aamma umiatsiamik pullattakkamik pitussinatik qimagutiinnarsimagunartut.
Ajornartorsiutaasoq
- Pisoq ajornartorsiutavoq, tamatuma malitsigisaanik isumalluuterpassuarnik asuli atuisoqarsimavoq. Taamaammat Iggiaata umiatsialiviani pasinartunik innuttaasut takunnissimasinnaasut uagutsinnut sianernissaannik qinnuigaavut. Taamatut pisoqartarneqa unitsikkusupparput, pisariaqanngitsumimmi ernumatitsillutillu isumalluutinik asuli atuititsisarmata, pigaartut pisortaata Sermitiaq.AG-mut erseqqissaatigaa.