Skip to main content

Umiartornerlunneq marloriarluni annaassiniarnermik nassataqartoq

Ataasinngormat umiatsiaaqqat marluk - ataaseq Qaqortup eqqaani ataaserlu Aasiaat eqqaanni - silarlussiulermata, politiit Arktisk Kommandolu annaassiniarlutik ulappusersimapput.

Nuummi politiit pigaartuata Søren Bendtsenip isertuutinngilaa, piniartut ataasinngormat Aasianniit qernertanik qilalugarniarlutik umiatsiaaqqaminnik aallarsimasut ajornartorsiuleramik annassimanerat iluatsitsinerusoq.

- Nittaalaleriasaarsimavoq, umiatsiaaqqallu aappaani piniartut taamaammat isigisaarussimapput tammartajaalerlutillu, pigaartoq Søren Bendtsen Sermitsiaq.AG-mut ilisimatitsivoq. Piniartut arlaat ajoratik nunamut anngussinnaasimapput.

GPS-eqanngitsut

Umiatsiaaqqaminni GPS-eqarsimanngillat, annaassiniarnerlu aallartinneqarluni. Arktisk Kommandomit nalilerneqarsimavoq, umiarsuit alapernaarsuutit Triton aamma Lauge Koch Aasiannukartinneqartariaqartut ujaasinermut peqataajartortillugit.

Piniartut marluk umiatsiaaqqamiittut iluatsitsillutik kilisaat Polar Nataarnaq Aaasiaat kitaani 37 sømilisut ungasitsigisumiittoq attavigisimavaat. Triton aamma Lauge Koch suli takkutinngitsut kilisaatip piniartut ikiorsinnaasimavai. Orsueruttoorluinnalersullu ikiuiartortut takkussimapput.

Arktisk Kommandomit ilisimatitsissutigineqarpoq, Sakkutuut imarsiortut angerlamut aallarnissaata tungaanut nalunaaquttap akunnerini arfinilinni ujaasisimallutik.

Kujataani annaassiniarneq

Kujataani inuit marluk aalajangersimapput, umiatsiaaqqamik mikisumik Qaqortumiit Narsamut aquuteralanniarlutik.  Taakku aamma silarlummit pakasarneqarsimapput.

- Imaatigut ingerlaarneq nalinginnaasumik nalunaaquttap akunneranik ataatsimik sivisussuseqartarpoq, pineqartullu takkutinngimmata ilaqutaasut soorunami ernumalersimapput. Ujaasinermik aallartitsissalluta aalajangersimavugut, politiillu angallataat ujaasiartortillugu aallartillugu, Søren Bendtsen ilisimatitsivoq.

Paasinarsivorli, taakku marluk – qanigisaminnut nalunaaruteqaqqaaratik – silarlulermat illuaqqamut oqquiartorsimasut. Sumiissusersineqaramik ajornartorsiutitaqanngitsumik Narsamut ingerlaqqissinnaasimapput.

Ernumatitserujussuartarneq

- Aalajangiinertik pillugu qanigisaminnut nalunaaruteqarnissaq eqqaamasanngilaat. Tamatuma malitsigisaanik ernumatitserujussuartarput pisariaqanngitsumillu ujaasititsisarlutik, Søren Bendtsen erseqqissaavoq.

Pigaartut ittuata kaammattuutigaa, imaatigut angalanermi isumannaallisaanissaq eqqumaffigineqarnerusariaqartoq.

-Ippassaq avannaani GPS-eqanngitsut ajornartorsiorput. Uagutsinnut pingaaruteqarpoq, ujaasissagutta sumi inissisimanerannik ilisimasaqarnissaq. Piniartut iluatsitsisimanngippata ajorluinnartumik kinguneqarsimasinnaagaluarpoq. Kujataani oqquisimanertik pillugu sianersimasuuppata, pisariaqanngitsumik ernumasoqarsimassanngikkaluarpoq. Uagullu pisariaqanngitsumik ujaasissimassanngikkaluarpugut, pigaartut ittuat nukillaajummersimasoq oqarpoq, taassumali nuannaarutigaa inuit umiatsiaararsorsimasut ajoratik nunnissimanerat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER