Umiartorneq: DMI-p aamma RAL-ip qaammataasaq nutaaq misilerarpaat

Umiarsuit akunnattumik angissusillit aamma mikinerusut paasissutissanik aallernissaminnut ajornakusoortitsisinnaapput, taamaalillutillu Kalaallit Nunaanni imaluunniit Issittumi sumiiffinni allani angalanerminni silassamik nalunaarutit nutartikkat pissarsiariuminaatsittarlugit. Qaammataasat umiarsuit attaveqaatigisaat nalinginnaasumik ækvatorip nalaatigut ingerlaarnerannik tamanna pissuteqarpoq.

- Ilaat paasissutissaateqarpiaratik angalasarput, avalannginnerminni paasissutissanik katersisaramik. Ulluni arlalinni angalagaanni, paasissutissat pisoqalisarput, Jacob L. Høyer, Danmarkip silasiorfiani DMI-mi Qaammataasanut Issittumullu tunngasuni aqutsisoq nassuiaavoq.

Aaqqiissuteqartoqarsinnaasoq taanna oqaluttuarpoq. Sapaatip akunnerani matumani danskit qaammataasaataat atorlugu silaannarsuarmut Space X-raketti Transporter 6, Floridami Cape Canaveralimit aallartinneqarpoq.

Aalborgimeersut Sternula Aalborg Universitet, DMI aamma danskit suliffeqarfii arlallit suleqatigalugit qaammataasamik ilusilersuillutillu sanaartortuupput.

Pitsaanerusumik attaveqatigiinnissamut periarfissiisoq

Nunarsuaq kaavillugu ingerlaassaaq, taamaalilluni Issittoq qulaattassavaa, tassuunalu umiarsuit sumiiffimmiittut pitsaanerusumik attaveqarfiginissaannut periarfissiissaaq.

- Umiarsuit Issittumi aamma Kalaallit Nunaanni angalaneranni paasissutissanik tunniussisinnaanitsinnut periarfissatsialammik takugatta, suliniummut tassunga ilannguppugut.

- Siku aamma silap pissusia pillugu paasissutissaqarnerutillugu kiisalu aarlerisaarutit umiarsuit tigusaqarsinnaanerisigut isumannaallisaaneq annertusineqassaaq, Jacob L. Høyer oqarpoq.

Qaammataasamut attavinittoqarsimasoq, Jacob L. Høyer oqaluttuarpoq, atortorissaarutillu maanna qaammatit arfinillit missaanni Royal Arctic Line suleqatigalugu misilittarneqassapput.

Atortut RAL-ip umiarsuaataannut ikkunneqartut

- Taakku Royal Arctic Linep umiarsuaataannut arlalinnut ikkussorneqaleruttorput, qaammatinilu arfinilinni tulliuttuni atortut misilerarneqassapput, Royal Arctic Linemiillu atuisunit paasissutissanik katersisoqarluni.

Atortut sisamat assigiinngitsut misilinneqassasut, taassuma oqaatigaa:

• Umiarsuit sumiiffianni silap qanoq inneranik paasissutissat
• Siku pillugu umiarsuarmut nalunaarutit
• Silassamik nalunaarutit naatsut allakkat, assersuutigalugu sumiiffimmi umiarsuup angalaffiani silap ulorianarsinnaanera pillugu
• DMI-p silamik ilimasaarutaanik pitsanngorsaataasussanik umiarsuarmit takusat pillugit paasissutissat

Qaammataasamik suliniut Danmarkimi Innovationsfondenimit tapiiffigineqarpoq, kisianni niuernikkut iluatsinnissaa Jacob L. Høyerip neriuutigaa, siunissamilu pitsanngorsarneqarsinnaajumaartoq:

- Arlaanni umiarsuarni Issittumi Kalaallit Nunaatalu eqqaani angalasuni tamani nalinginnaasunngornissaa neriuutigaarput, taamaalillutik sikumut, anorimut aamma sila pillugu paasissutissanik namminerisamik ingerlasunik pissarsisinnaassasut.

- Kisitta isumagisinnaanngilarput, kisianni atortut atorneqarnerulerpata isumagisinnaavarput, tunniussinnaanerpullu ilimanaateqarluarpoq.