Umiarsuup ikkarlissimasup kaanngarteriarnera iluatsinngitsoq
Pinngortitaleriffiup aalisarnermi misissuilluni umiarsuaataata Tarajup takornariartaat ikkarlissimasoq Oceans Explorer kalillugu kaanngarteriaraluarpaa, iluatsinnaguli. Umiarsuaq nakkutilliiartortitaq, umiarsuarmik ikiuiartortoq ullut marluk qaangiuppata tikissangatinneqarpoq.
Pinngortitaleriffiup aalisarnermut tunngatillugu misissuinerni umiarsuaa, Tarajoq, takornariartaammik Ocean Explorerimik ikkarlissimasumik kalitsissutitut atorlugu kaanngartitseriaatigineqaraluarpoq. Tamannali iluatsissimanngitsoq, Arktisk Kommando Facebookimini allappoq.
- Misissuinerit siulliit umiarsuillu marluusut attaveqatigiinneri siulliit pereermata, Ocean Explorer Tarajumit kaleriarneqaraluarpoq, ikkarliffianit kaanngartinniarneqarluni. Misiliinerli iluatsinngilaq, taamaattumik Ocean Explorer suli Alpefjordimi ikkarleqqavoq, Arktisk Kommando ilisimatitsivoq.
Nunarsuaq tamakkerlugu nakkutigineqartoq
Umiarsuaq takornariartaat Tunumi Alpefjordimi ikkarlissimasoq ataasinngornermi ilisimaneqalerpoq. Tamassuma kingorna nunatsinni nunanilu allani tusagassiorfiit pisoq, annaassiniaanerillu allaaserisarpaat. Arktisk Kommando maanna Facebookimini kaammattuuteqarpoq suliamik suliaqarniarnerminni eqqissisimatinneqaqqullutik. Suliamut tunngatillugu nutaarsiassaqartillugu nalunaaruteqassallutik ilisimatitsipput.
- Arktisk Kommandop suliassani pingaarnertut isigaa umiarsuup nakkutilliiartortitap Knud Rasmussenip ikkarlissimasumut piaarnerpaamik apuunnissaa. Knud Rasmussen piaarnerpaamik apuunniarpoq.
Knud Rasmussenip angallaviani sila atoruminaammat umiarsuaq kingaallattariaqarsimavoq. Umiarsuaq Alpefjordimut tallimanngornermi unnukkut tikiunnissaa naatsorsuutigineqarpoq.
