Umiarsuit tunitsiviit Royal Greenlandimut najummassimanartorsiortitsipput
Umiarsuit tunitsiviit aalisakkerivinnut pisortanit pigineqartunut oqimaaqatigiinngitsumik unammillertuusut, Royal Greenland A/S aamma Arctic Fish Greenland A/S isumaqarput. Suliffeqarfiilli 2019-imi umiarsuarnik tunitsiviliiniarlutik soqutiginnittut amerlanissaat, Aalisarnermut Piniarnermut Nunalerinermillu Naalakkersuisoqarfimmit, APNN-mit naatsorsuutigineqarpoq.
Royal Greenland A/S aqutsiveqarfik Uummannami sisamanik aalisakkeriviuteqarpoq, suliffeqarfillu alla unammillertuusoq Avannaa Seafood Aps, aamma ataatsimik aalisakkeriviuteqarluni. Uummannaq Seafood A/S, ilaatigut Halibut Greenland A/S-imit piginneqataaffigineqartoq, Illorsuarni aalisakkeriviutaa, Illorsuit siorna matuneqarnerata kingorna atorunnaarpoq. Suliffeqarfilli manna Uummannap sulluani umiarsuarmik tunitsiviliivoq.
Aviisi Sermitsiaq taama allappoq.
Royal Greenland A/S taassuma suliffeqarfiutaa Arctic Fish Greenland A/S, aqutsiveqarfik Upernavimmi katillugit arfineq pingasunik aalisakkeriuteqartut, suli maannakkumut kisiartaallutik tamaani aalisakkeriviuteqarput.
Suliffeqarfilli nutaaq Nuussuaq Fish Aps, septemberi ilanngullugu Nuussuup eqqaani umiarsuarmik tunitsivimmik ingerlataqarput. Suliffeqarfiup Nuussuarmi aalisakkeriviliornissaq soqutigingini siornatigut oqaatigereerpaa. Ilaatigut Kangaatsiap eqqaani tunitsiveqarnikkut ajornartorsiuteqarneq pissutingalugu, Royal Greenland aasaq Kangaatsiap eqqaani saarullunnik tunitsivimmik umiarsualiivoq. Kitaa Seafood Aps Nuup eqqaani ukioq manna saarullinnut umiarsuarmik tunitsiviliisussaagaluartoq, aamma Papik Fish Aps, Kangersuatsiap eqqaani umiarsuarmik tunitsiviliisussaagaluartoq, Naalakkersuisunit tunitsiviliinissamut akuersissutiminnik atuuttussanngortitsinngillat.
Ukiut kingulliit avannaani qaleralinniarnermut soqutiginninneq annertusiartorsimasoq, Aalisarnermut Piniarnermut Nunalerinermillu Naalakkersuisoqarfimmit oqaatigineqarpoq.
Kisiannili aqutsiveqarfinni Uummannami Upernavimmilu umiarsuarnik tunitsiviliisimaneq aalisakkerivinnut unammilleqatigiinnermik oqimaaqatigiinngitsumik pilersitsiffiusimasoq, Royal Greenland A/S aamma Arctic Fish Greenland A/S isumaqarput.
Royal Greenlandimut akornataasoq
Ukiuni kingullerni Royal Greenland A/S sinerissami sumiiffinni assigiinngitsuni aalisakkerivinnik matoqqasunik nutarteralunilu ammaasarsimasoq, taamaalillunilu suliffissanik pilersitsiinnarani aammalu tunitsiveqarnikkut pitsaanerusumik atugassaqartitsilersimasoq, Royal Greenland A/S-imi pisortaq Jens K. Lyberth oqarpoq.
Aqutsiveqarfinnili Uummannami aamma Upernavimmi umiarsuarnik tunitsiviliisimaneq Royal Greenland A/S-imut Arctic Fish Greenland A/S-imullu ilungersuatitsivoq.
- Avannaa Seafood Apsip Uummannami aalisakkeriviuteqarnera unammilleqatigiinnikkut soorunami malugaarput. Nunamili suliffissuit unammilleqatigiinnerat naapertuuttumik ingerlavoq. Umiarsuarnilli tunitsiviliisarnerit aalisakkerivinnut pitsaanngitsumik kinguneqartarpoq. Tamanna oqimaaqatigiinngitsumik unammilleqatigiinnermik pilersitsineruvoq, Jens K. Lyberth Sermitsiamut oqarpoq.
Umiarsuit tunitsiviit pillugu allaaserisaq aviisimi Sermitsiami atuarsinnaavat. Aviisi uani ataani pissarsiarisinnaavat.