Great Greenland

Umiarsuit tunitsiviit puisit amii amerlanerusunik

Puisi amiisa tunineqartartut ikiliartuinnarnerat Great Greenlandip ernumassutigaa. Tamanna pissutigalugu ingerlatitseqatigiiffiup ullumikkumiit atuutilertumik sapaatit-akunneri sisamanik Kujataani umiarsuarmik tunitsiviliipput.

Manglen på sælskind får Great Greenland til at indsætte et indhandlingsskib i Sydgrønland.

- Puisit amiinik tunniussorneqartut ikiliartuinnarnera, piniartulli isertitaasa ikiliartuinnarnera, isiginnaanginnarsinnaanngilarput. Piniartut arlallit aammalu piniartut peqatigiiffiisa umiarsualiineq aaqqissutissaanerartarpaat, taamaasiornikkummi sineriammi amerlanerit tikinneqartalissangamik, tamannalu pissutigalugu Kujataani taamatut misiliilerpugut, Great Greenlandip pisortaanera, Ditte Sokrnæs tusagassiuutinut nalunaarummi oqaluttuarpoq.

Misilittakkat takutippassuk tamanna iluaqutaasoq, ukiup tulliani ingerlatitseqatigiiffiup Kalaallit Nunaata sineriaani amerlanernik umiarsualiinissanik eqqarsaatigissavaa.

Great Greenlandip Georg Larsens LK Larsen II sapaatit-akunneri sisamani attartorpaa. Aggustillu aallaqqaataani umiarsuaq Qaqortumiit Nanortalimmukassaaq, tassanngaanniillu uumasoqarfiit amerlanerit tikillugit kujammut ingerlaassalluni. Umiarsuup sumiinnera piniartut radiokkut malinnaavigisinnaassavaat. Saniatingooralugu piniartut puisinik iluitsunik annertuallaamik orsoqanngitsunik tunisisinnaassasut, tusagassiuutinut nalunaarummi erserpoq.

Powered by Labrador CMS