sikkerhed
Umiarsuit takornariataatit ilaat sumiissusersineqarsinnaassapput
Issittumi umiarsuarnik takornariartaatinik ingerlatsisut kattuffiannut AECO-mut ilaasortat maanna piumaffigineqalerput programmimik umiarsuit sumiissusersineqarsinnaaffiannik atugaqassasut
Issittup imartaani umiarsuit isumannaatsuunissaat annertusarniarlugu selskabit umiarsuarnik takornariartaatinik ingerlatsisut AECO-mut (Association of Arctic Expedition Cruise Operators-imut) ilaasortaasut peqquneqarput systemimik umiarsuarnik sumiissusersiummik satellitsimik tunngavilimmik atugaqassasut.
Tassa selskabit 20-it missarpiaat, Issittumi umiarsuarnik takornariartaatinik ingerlatsisut, aaqqissuussinermi peqataapput.
Taamatut AECO tusagassiorfinnut nalunaarutikkut paasissutissiivoq.
Programmi imatut atuuppoq quppernermut nittartakkamut iserluni umiarsuarnut tamaaniittunut allanut paasissutissanik pisarluni. Paasissutissat tassaapput umiarsuup aqqa, sumiiffia, sumunngarfia sukkassusialu.
– Angallatit allat sumiinnerannik sumunngarfiannillu paasissutissat, ingerlatsisut issittumi ingerlatsinermut pilersaarusiorneranni ulorianarsinnaasunut naliliineranni immikkoortut pingaaruteqartuupput, AECO-p pisortaanera Frigg Jørgensen oqarpoq, taassumalu aamma erseqqissarpaa systemi SAR-imut, Search and Rescue-mut atatillugu atorneqarsinnaasoq.
Systemimik sumiissusersiummik allamik oqartussaasut atugaannik peqateerpoq, AIS, Automatic Identification System, systemili taanna umiarsuit inuinnarnik angallassisut atorsinnaanngilaat.