Umiarsuit takornariartitsisartut 388-it tikissinnaanerat neriuuteqartitsilersoq
Umiarsuilli takornariartitsisartut 2022-mi nunami maani angalanissaannut atugassarititaasut nalunaarutigineqapallattariaqarput, taamaanngippammi ukiup siuliini marlunisulli pisoqassaaq, Visit Greenland naliliivoq.
Coronap nunarsuarmi tuniluunnera takornariartitsisartunut, minnerunngitsumillu umiarsuarnut takornariartitsisartunut sakkortuumik kingunerlussimavoq. Ukiut siuliini marlunni umiarsuarni ilaasut coronamik tunillaassuisinnaanerat ernumassutigalugu tikittussat taamaatiinnarneqartarsimapput.
Ukiuni marlunni kingullerni takornariartitsiniarneq ajutoorsimagaluartoq ingerlatseqatigiittiit soqutiginninnerat allanngorsimanngilaq, immaqalu suli soqutiginninnerulersimallutik. Visit Greenlandimi pisortap tullia Mads-Daniel Skifte, 2022-mi umiarsuit takornariartaatit tikinnissaminnik nalunaaruteqarsimasut amerlassusaannik misissuisimasoq oqaluttuarpoq:
- Ajunngilluinnartutut isikkoqarpoq. Umiarsuimmi takornariartaatit 388-it Qaanaamiit Ittoqqortoormiit tikillugit tikittussatut nalunaarutigineqarsimapput, amerlaqaallu.
-Umiarsuarsuit 2000-it sinnerlugit ilaasoqarsinnaasut arlallit tikinniartut aamma maluginiarsimavarput. Takusinnaavarput uniarsuit assigiinngitsut arfineq-pingasut Kalaallit Nunaannut aqqusaarniartut, Mads-Daniel Skifte oqarpoq.
Pisortap tulliata oqaatigaa, 2019-imi tikittut amerlanerpaasimasut amerlaqqatigingajaat tikinniarlutik nalunaarsimasut.
Politikkerit qanoq aalajangiissanersut apeqqutaasoq
Umiarsuit takornariartaatit nunani tamalaani angalaqqilersimapput, tamannali ajornartorsiutitaqanngitsuunngilaq. Umiarsuit takornariartaatit minnerpaamik sisamat ilaasui juullilersoq Amerika Avannarlermi, Amerika Qiterlermit Amerikamilu Kujallermi nunamut nioqqusaasimanngillat, tassa umiarsuarni ilaasut arlallit covid-19-imik tunillatsissimammata. TV2 CNN-ip paasissutissaatai tunngavigalugit taamatut allassimavoq.
Mads-Daniel Skifteli aamma nangaanartoqartitsivoq, piffissamimi aggersumi politikkerit qanoq aalajangiissanersut takornariartitsoqarnissaanut apeqqutaammata.
- Umiarsuit takornariartaatit Kalaallit Nunaanni umiarsualivimmut talitsinnatik ulluni 14-ini avataaniittarnissaannik piumasaqaatit sakkukillineqassasut neriuutigaarput, taanna oqarpoq.
Naalakkersuisut 2022-mi takornariartitsinissamut malittarisassani piffissami qanittumi nalunaaruteqanngippata, ukiut siulii marluk assiginik pisoqarsinnaavoq, taanna oqarpoq:
Kalaallit Nunaat suli soqutigineqarluartoq
- Qaammatit marluk matuma siornatigulli nalunaaruteqarsimassagaluarput. Takornariartitsisartut piareersarnissamut piffissaqarniassammata nalunaaruteqarnissaannik kaammattorsimavavut. Neriuutigaarpulli Naalakkersuisut ukiumi nutaami nalunaaruteqapallakkumaartut. Takornariartitsinissammi ilaanut tamanna iluaqutaasinnaammat, Mads-Daniel Skifte oqarpoq.
Pisortap tulliata oqaluttuaraa, umiarsuaatileqatigiit tunisassiaminnik tunisaqarsinnaanerlutik paasisaqarnissaat, taamalu pilersaarusiorsinnaanerat nunamilu maani takornariartitsisartunik isumaqatigiissusiorsinnaanerat matumani pineqartoq.
Mads-Daniel Skiftep ukiut siuliini marlunni taamaatitsiinnartoqartaraluartoq Kalaallit Nunaata takornariarfissatut soqutigineqarluarnerata annertusiinnarsimanera pitsaasusut isigaa:
- Kalaallit Nunaat soqutiginarluarpoq, silap pissusaata allanngoriartornera takuneqarsinnaammat aamma amerlavallaanngitsut nunatsinniissimammata. Pingaartumik misigisassarsiortarlutik takornariartartunit kulturimik pinngortitamillu misigisaqarusulluinnartartunit soqutigineqarluinnarpugut.
- Taakkorpiaappullu amerlanerullutik takornariartarnissaannik takorusutaqartugut. Misissuisimanerit takutippaat, ilisimasassarsiuutigaluni umiarsuarmi takornariartaammi ilaasut najukkani kaaviiaartitat 65 procentiinik pissarsisitsisartut, uniarsuillu takornariartaatit nalinginnaasut ilaasui 15 procentimik pissarsisitsisarlutik, pisortap tullia oqarpoq.
Traveltrade.gl-imi takuneqarsinnaapput, umiarsuit takornariartaatit nunamut maanga tikittussaasut allattorsimaffii.