takornariaqarneq
Umiarsuit takornariartaatit tikittarnerat allannguuteqanngitsut
Tikittussat amerlassusaat allannguuteqagaarsimanngillat, kisianni takornarissat amerlanerulaassapput. Ukioq manna umiarsuit takornariartaatit taama ingerlassapput.
Ippassaq Sea Spirit Nuummut tikimmat, umiarsuit takornariartaatit tikeqattattaarnissaat aallarnerneqarput.
Ukioq manna ajunngilluinnartumik ingerlassagatinneqarput. Umiarsuit tikittussat nalunaarsorneqarsimaneri ukiup siulianut sanilliunnerini allannguuteqagaarsimanngillat.
Ukioq kingulleq umiarsuit takornariartaatit 349-ut nunatta illoqarfiinut assigiinngitsunut tikissimapput. Ukioq mannalu 348-ut tikinnissartik nalunaarutigisimavaat. Visit Greenlandip pisortaanerup tullia, Anders la Cour Vahl, taama paasissutissiivoq.
Ukioq manna umiarsuit tikittussat agguaqatigiisinnerini anginerulaassapput, taamaasilluni takornarissat amerlanerunissaat naatsorsuutigineqarsinnaalluni.
Umiarsuit takornariartaatit ikileriartut
2011-miit 2014-mut umiarsuit takornariartaatit ikilingaatsiarput. Umiarsuit takornariartaatinut akitsuusersorneqarnerni ikilisimanerannut pissutaanerpaavoq. Akitsuulli 2016-mi malunnaatilimmik appartinneqarpoq.
- Akitsuutilli annikillisinneqarsimanera 2018-mi aatsaa malunnaateqarnissaa ilimagaarput, Anders la Cour Vahl Sermitsiaq.AG-mut oqarpoq.
- Umiarsuaatileqatigiit umiarsuit takornariartaatimik siumungaatsiaq pilersaarusiortarnerat pissutaavoq.
Ukioq manna umiarsuaq siulliulluni tikittoq Sea Spirit, pileraarutit malillugit Kangerlussuarmi ilaasuminik taarsiiartussaaq.
Sikoqarneralu pissutigalugu taama iliortoqarsinnaanera qularnarpoq.
- Tamanna pissanngatigaarput, taamaaliortoqarsinnaanngippalli ilaasuminnik Nuummi taarsiisariaqassapput tamannali akisuneruvoq, Anders la Cour Vahl oqarpoq.